И.Метшин: «БМО көн тәртибендә милли хөкүмәтләр кенә түгел, җирле һәм төбәк хакимиятләре дә тәкъдим ителергә тиеш»

(Казан шәһәре KZN.RU, 16-нчы ноябрь, Алена Мирошниченко). «Дөнья тигезлеген югалткан вәзгыятьтә һәр шәһәрнең, һәр муниципалитетның тотрыклылыгына ярдәм итү бик мөһим. Бөтен дөньядагы шәһәрләрнең тавышлары ышанычлырак яңгырасын иде», - мондый фикерне бүген Казан Башкарма комитетында узган эшлекле дүшәмбедә Татарстан башкаласы Мэры һәм БМОның Җирле үзидарә мәсьәләләре буенча консультатив комитеты (UNACLA) президенты Илсур Метшин белдерде. Узган атнада ул «Берләшкән шәһәрләр һәм җирле хакимиятләр» Бөтендөнья оешмасының онлайн-утырышларында катнашты. Монда ул БМО структурасына җирле һәм төбәк хакимиятләре вәкилләреннән торган һәм аларның мәнфәгатьләрен яклаган яңа орган кертү тәкъдиме белән чыгыш ясады.

«Берләшкән шәһәрләр һәм җирле хакимиятләр»нең узган Бөтендөнья советы утырышында сүз бөтен дөнья буенча хезмәттәшләребезнең бүген пандемия китергән сынауларны ничек үтәүләре турында барды. Сөйләшү һәм пандемия үзе һәр муниципалитетның эшенең никадәр мөһим булуын ачык күрсәтте, чөнки һәркем ситуация үсешен үзенчә күрә. Проблемалар һәм сынаулар барысы өчен дә бертөрле булуга карамастан, алар һәр төбәктә үзенчә хәл ителә: һәркайда үз чаралары, үз оештыру чаралары бар. Безнең реаль вакыт режимында иң яхшы практикалар белән алмашу, бер-беребез белән киңәшләшү һәм тәҗрибә туплау мөмкинлегебез булу бик мөһим, - дип ассызыклады Илсур Метшин.

Видеоконференция режимындагы сессияләрнең берсендә БМО генераль секретаре Антониу Гутерриш катнашты. «Шул исәптән аның алдында БМО көн тәртибендә милли хөкүмәт кенә түгел, ә шәһәрләр, җирле һәм төбәк хакимиятләре тәкъдим ителүе турындагы мәсьәлә куелды», - диде шәһәр башлыгы. UNACLA президенты чыгышы утырышта катнашучыларда җанлы җавап тапты.

«Берләшкән шәһәрләр һәм җирле хакимиятләр» Бөтендөнья советы 9-нчы ноябрьдән 13-нче ноябрьгә кадәр Кытайның Гуанчжоу шәһәрендә узды, дөньяның башка илләреннән катнашучылар дискуссияләргә онлайн-форматта кушылды. Фикер алышуда Швейцариянең, Италиянең, Испаниянең, Франциянең, Көньяк Африка республикасы, Колумбия, Марокконың, Бөекбританиянең, Мексика, Мавританиянең, Эквадор һәм Швециянең төрле шәһәрләре башлыклары катнашты.