10 майда “Казан” каршында FIFA җанатарлары фестиваленең вакытлыча инфраструктурасын төзү эшләре башлана

(Казан шәһәре KZN.RU, 16-нчы апрель, Екатерина Виславская). Быел Казанда Футбол буенча дөнья чемпионатына әзерләнү кысасында гомуми мәйданы 2 млн кв. м тәшкил итәчәк - 39 машина юлы өлеше, 83 шәһәр урамы, 14 тротуар һәм торак массивлардагы 59 урам төзекләндереләчәк. Яшеллек утырту белгечләре 23 мең кв.м. чәчәк түтәлләре, 3 мең кашпо һәм чәчәк вазоны, 3,7 мең агач, 20 мең куак утыртырга, 7,5 мең кв.м мәйданлык газон җәергә ниятли. Моның турында бүген эшлекле дүшәмбе барышында Казанның Башкарма комитеты җитәкчесенең беренче урынбасары Дамир Фәттахов хәбәр итте.

Җәй көне FIFA җанатарлары фестивале ачылачак “Казан” гаилә үзәге мәйданында төзү эшләре төгәлләнеп килә. Бер айдан кимрәк вакыт эчендә 10-нчы майда фестиваль өчен вакытлыча инфраструктура төзү эшләре башланачак.

Казан Мэры Илсур Метшин үтәлгән эшләрнең сыйфатын контрольдә тотарга кушты. Шулар арасында: юлларны һәм шәһәрне төзекләндерү, транспорт инфраструктурасын кунакларны каршы алуга әзерләнү. “Эш безгә таныш, барысы да аңлашыла, шуңа да карамастан аны яңа ысуллар белән үтәргә мөмкин. Дөнья чемпионаты катнашучылары һәм кунаклары өчен Казан үзенчәлекле шәһәр итеп истә калсын иде. Чемпионатка кадәр вакыт сәгатьләп исәпләнә, без эшебезгә ныграк алыныйк”, - -диде шәһәр башлыгы.