И.Метшин: “Физкультурачы көненең төп бүләге – кубоклар түгел, ә халык сәламәтлеге”

(Казан шәһәре KZN.RU, 7-нче август). Физкультурачы көне – ул мөһим чара, биредә халык пассив тамашачы түгел, ә актив катнашучы, дип билгеләде бүген Казан Мэры Илсур Метшин эшлекле дүшәмбе барышында.

Физик культура һәм спорт комитеты рәисе С.Вострикова хәбәр иткәнчә, Казанда Физкультурачы көне 12-нче августта “Казан” гаилә үзәге янындагы территориядә уздырылачак. “Шәһәр халкы һәм кунаклары өчен спортив чаралар һәм мастер-класслар оештырылачак”, - диде комитет рәисе. Мәйданчыклар 10.00 сәгатьтән эшли башлаячак.

“Әлеге бәйрәм бездә гадәткә керде. Казанлылырның өчтән бере даими рәвештә авктив спорт белән шөгыльләнә”, - диде И.Метшин. Шәһәр башлыгы Физкультурачы көнен тиешле дәрәҗәдә уздыру зарурлыгын билгеләп узды һәм район администрация башлыкларына әлеге мәсьәләне контрольдә тотарга йөкләде. “Төп бүләк биредә грамота һәм кубоклар түгел, ә халык сәламәтлеге, спорт рухы һәм сәламәт яшәү рәвеше”, - диде Казан Мэры.