Казанның ике районы бер елда 150 млн сумнан артык гуманитар ярдәм җыйган

Бер ел эчендә Казанның Вахитов һәм Идел буе районнары администрациясе эшмәкәрләр ярдәме белән 150 млн сумнан артык гуманитар ярдәм җыйган. Моннан тыш бизнесменнар махсус хәрби операциядә катнашучыларның гаиләләренә ярдәм итәләр, хәрби хәрәкәтләр зонасындагы хәрбиләр янына баралар һәм шефлыкка алынган шәһәрләрне торгызуда булышлык күрсәтәләр.

Аппарат киңәшмәсендә чыгыш ясаган районнар администрациясе башлыгы Альберт Салихов сүзләренә караганда, бүгенге көндә махсус хәрби операциядә катнашучыларның 1065 гаиләсе патронажга алынган – аларга барлык төр мәсьәләләрне хәл итүдә ярдәм күрсәтелә.

«Бу безнең бурычыбыз һәм даими эш фронты», – дип ассызыклады чыгыш ясаучы.

Махсус хәрби операциядә катнашучыларның балалы гаиләләренә ярдәм итү максатыннан Казанда ташламалар исемлеге расланды. Алардан файдалану ысуллары турында +7(843)558-74-18 телефон номерына шалтыратып белергә була.

Районнар администрациясе махсус хәрби операциядә катнашучыларга гына ярдәм итеп калмый. Мәсәлән, Kazan Mall сәүдә үзәге җитәкчелеге ярдәме белән «Игелекле сувенир» утраучыгы ачылган. Анда сәламәтлеге ягыннан мөмкинлекләре чикле балалар һәм өлкәннәр кулы белән ясалган сувенирлар һәм товарлар сатыла. Бүгенге көндә 350 мең сумнан артык продукция сатылган иде.

«Шәһәр кешеләргә яраткан эшләре белән шөгыльләнергә һәм акча эшләргә мөмкинлек бирә. Бу шуның ачык мисал. Утрау «Игелекле Казан» бренды белән ачылды», – дип өстәде Альберт Салихов.

Ул быел Ипподром урамында укыту-күнекмәләр фатиры ачылачагын да искә алып үтте. Психик тайпылышлары булган һәм аутистик спектры бозылган балалар өчен 224 кв.м мәйданда балалар бакчасы, шулай ук фатир җиһазландырылачак. Анда тьюторлар балаларны көнкүреш күнекмәләренә һәм мөстәкыйль яшәүгә өйрәтәчәк.