«Яңа елча бизәлгән Казан» конкурсына гаризалар кабул итү 31 нче гыйнварга кадәр озайтылды

(Казан шәһәре KZN.RU, 15 нче гыйнвар, Камилә Вилданова). «Яңа елча бизәлгән Казан» конкурсына гаризалар кабул итү 31 нче гыйнварга кадәр озайтылды. Мондый карарны катнашучыларның күпчелеге үтенече буенча кабул иттеләр, дип хәбәр итте шәһәр Башкарма комитетында узган эшлекле дүшәмбедә Туризмны үстерү комитеты директоры Дарья Санникова.

«Шәһәрнең бәйрәмчә бизәлешендә катнашкан һәм үз учреждениеләрен бизәгән барлык эшмәкәрләргә рәхмәт белдерәсем килә. Бу, әлбәттә, Казанга бәйрәм төсләре өстәде һәм шәһәр халкының һәм кунакларының кәефен күтәрде. Елдан-ел кунакханә һәм кафе, ресторан һәм кибетләрнең яңа ел бизәлеше кызыклырак һәм профессиональлеккә әйләнә бара, шуннан Казан бизнесының клиентка йөз тоткан булуы турында нәтиҗә ясарга мөмкин», - дип билгеләде Мэр Илсур Метшин.

Конкурста барлыгы биш номинация каралган: «Бинаның яңа елда иң яхшы бизәлеше – шәһәрлеләр сайлавы», «Бинаның яңа елда иң яхшы бизәлеше – эксперт жюри сайлавы», «Бина эченең яңа елда иң яхшы бизәлеше – шәһәрлеләр сайлавы», «Бина эченең яңа елда иң яхшы бизәлеше – эксперт жюри сайлавы» һәм «Кышкы Казанның иң яхшы фотоэше – эксперт жюри сайлавы».

Гаризалар түбәндәге электрон почта аша кабул ителә: tourism.kzn@tatar.ru. Тавыш бирү шәһәр Мэриясенең рәсми порталында 5-16 нчы февральдә узачак. Нәтиҗәләр февральдә билгеле булачак, дип сөйләде Дарья Санникова.

Исегезгә төшерәбез, җиңүчеләргә дипломнар һәм истәлекле бүләкләр тапшырылачак. Эксперт жюрие карары буенча номинацияләрдә беренче урыннарны алган конкурсантларга акчалата призлар каралган.