Казан Лисичанск һәм Рубежноены Яңа ел белән котлый – ТР шефлыгындагы шәһәрләрдә яшәүчеләргә бүләкләр, мандариннар һәм чәкчәк җибәрделәр

(Казан шәһәре KZN.RU, 20 нче декабрь, Камилә Вилданова). Казаннан Лисичанск һәм Рубежноега быел соңгы 95 тонна авырлыктагы гуманитар йөк җибәрделәр. Яңа ел алдыннан Татарстан шефлыгындагы шәһәрләрдә яшәүчеләргә өч мең татлы балалар бүләкләре һәм 20 тонна мандарин, шулай ук башка азык-төлек, кием, көнкүреш химиясе, төзелеш материаллары, дизель генераторлары, автозапчастьлар китереләчәк. Биш фурадан торган колонна составында гуманитар йөкне җибәрүне Казан Мэры Илсур Метшин контрольдә тотты.

«Чираттагы, уникенче, гуманитар колоннаны битараф булмаган казанлылар, бизнес вәкилләре ярдәмендә җибәрәбез. Без фураларны, элеккечә, Лисичанск һәм Рубежное җитәкчелегеннән килгән гаризадан чыгып комплектладык. Бу шәһәрләрдә яшәүчеләргә кием, көнкүреш химиясе, дарулар, пыяла, төзелеш материаллары кирәк. Һәм аерым, әлбәттә, фураларга Яңа ел тәм-томнары, бүләкләр төялде. Аларны өч мең бала алачак. Моннан тыш, без 20 тонна мандарин, милли ризыклар җибәрәбез һәм иң изге теләкләребезне юллыйбыз. Яңа ел бәхетләр алып килсен!»,- диде ТР башкаласы башлыгы. 

Казан халкы һәм предприятиеләре Лисичанск һәм Рубежное халкы өчен гуманитар ярдәм җыюда актив катнаштылар. Мәсәлән, «Химград» АҖ резидентлары бу шәһәрләрнең медицина учреждениеләренә медицина битлекләре партияләре, беренчел кирәк- яраклар һәм көнкүреш ихтыяҗлары өчен товарлар җибәргәннәр. Күмәч-кондитер комбинаты (БКК) балалар һәм өлкәннәр өчен татлы бүләкләр, шул исәптән чәкчәк белән тәэмин иткән. Бүләкләр йомшак «Аждаһа» уенчыгына (киләсе ел символы) тутырылган. «РИМ» медиатөркеме 11 тонна көнкүреш химиясе җыйган, йөк составына чистарту чаралары һәм порошоклар кергән. Шулай ук «Метроэлектротранс» МУП, «Казанның азык-төлек һәм социаль туклану департаменты» АҖ, «Волга-Автодор» СК һәм башка оешмалар ярдәм күрсәтте. 

«Мин предприятиеләргә рәхмәт сүзләрен белдерәсем килә: Казанның 350 дән артык оешмасы җыюда катнаша – 1300 тонна гуманитар йөкне без инде җибәргән идек. Ярдәм күрсәтүне дәвам итәчәкбез», – дип өстәде шәһәр башлыгы. 

Казанның мәгариф учреждениеләре дә йөк җыюга кушылды. Мәсәлән, 18 нче мәктәпнең 4Г сыйныф укучылары Лисичанск һәм Рубежное халкы өчен берничә посылка җыйганнар. Алар тартмаларга носкилар, тәм-томнар һәм теләкләр белән үз хатларын салганнар. 

Яңа ел алдыннан Татарстан шефлыгындагы шәһәрләрдә яшәүчеләргә ике фурада 40 тонна азык-төлек товарлары – ит һәм башка консервланган продуктлар, май, бакалея, ярма әйберләре, яшелчә, җиләк-җимеш җибәрелгән. Тагын бер фурага 20 тонна төзелеш пыяласы, ә икенчесенә 15 тонна дизель генераторлары һәм автозапчастьлар, кораллар, кием, көнкүреш химиясе һәм башкалар төялгән. Моннан тыш, китапханәләр өчен китаплар партиясе, фәнни- популяр һәм матур әдәбият, әлифбалар җибәрелгән. 

Колонна китәр алдыннан Мэр шоферлар белән аралашты. «Халык безне бик көтә. Казаннан йөкнең кайчан киләчәге турында даими рәвештә сорап торалар. Без килгәндә алар өчен бәйрәм. Шатлыктан күз яшьләре белән каршы алалар. Без бер ярым-ике көн эчендә барып җитәбез. Юлга бәйле», - дип сөйләде машина йөртүчеләрнең берсе Андрей Кашмов. 

«Без чираттагы тапкыр битараф булмаган казанлылар ярдәмендә җыю оештыра алдык. Сез 20 тонна мандарин, өч мең бүләк, кирәкле обмундирование, эш киеме, пыяла алып барачаксыз. Халыкка зур сәлам җиткерегез. Бу яңа ел бүләкләре белән сез Лисичанск һәм Рубежное шәһәрләрендә яшәүчеләргә тынычлык билгесе булып барып ирешсен. Сезне киләсе Яңа ел белән», - дип мөрәҗәгать итте шоферларга Илсур Метшин. 

Моннан тыш, хәрбиләр үтенече буенча махсус хәрби операция зонасыннан аларга яңа прицеллар, төнге күрү приборлары, рацияләр, пилотсыз очу аппаратларыннан саклану өчен җиһазлар һәм махсус киемнәр җибәреләчәк. «Алгы сызыктагы кешеләр өчен без гаризалар буенча кирәкле обмундированиены аерым җыйдык. Иң мөһиме: барысы да исән һәм сәламәт булсын, һичшиксез, өйләренә әйләнеп кайтсын. Без элеккечә Лисичанскига да, Рубежноега да, алгы сызыктагы барлык егетләребезгә дә ярдәм итәчәкбез», – дип ассызыклады шәһәр башлыгы. 

Казанлылар беренче кирәкле әйберләрне, уенчыкларны һәм башка әйберләрне гуманитар ярдәм җыю пунктларына китерә ала. Төп склад Горький шоссесы, 53а адресы буенча урнашкан (склад «Яшин»). Шулай ук әйберләрне яшүсмерләр клубларында урнашкан пунктларда һәм «Игелекле Казан» АКБО логотибы белән билгеләнгән спорт объектларында кабул итәләр. Аларның тулы исемлеге белән KZN.RU порталындагы махсус бүлектә танышырга мөмкин. 

Исегезгә төшерәбез, Казанда гуманитар ярдәмне үзәкләштерелгән җыю узган елның көзеннән алып барыла. Беренче партия ноябрьдә Лисичанскига җибәрелә. Шушы вакыт эчендә 68 машинада 1271 тоннадан артык йөк илткәннәр. Соңгы тапкыр Лисичанск һәм Рубежное халкына 90 тонна гуманитар йөк җыелган, ә хәрбиләр өчен махсус чаралар сатып алынган.