Назарбаев урамындагы күпер киләсе атнада ачылачак

(Казан шәһәре KZN.RU, 5 нче октябрь, Камилә Вилданова). Казан Мэры Илсур Метшин Назарбаев урамындагы Түбән Кабан күле аша күпердә күчмә киңәшмә үткәрде, анда ремонт эшләре тәмамланды. Яңа күпер аша транспорт хәрәкәте объектны файдалануга тапшыру акты алынганнан соң киләсе атнада ачык булачак. Хәзерге вакытта төзелгән объектның техник регламентлар һәм проект документациясе таләпләренә туры килүе турында нәтиҗә бирелгән инде.

«Бу Иске Татар бистәсенең тарихи өлешен шәһәр үзәге белән тоташтыручы мөһим транспорт артериясе. Әлбәттә, автомобиль хуҗалары һәм җәмәгать транспортында йөрүчеләр Кабан күле аша күпер юклыгын сизделәр. Юлның сыйфаты бик яхшы – бу шәһәргә шәп бүләк. Барлык эшләр дә тәмамланды, документларны аласы калды һәм хәрәкәтне җибәрәбез», – дип аңлатма бирде Илсур Метшин.  

Эш барышында полосалар саны алтыдан сигезгә кадәр арттырылган, күчәргә йөкләнеш – 15 тоннадан 25 тоннага кадәр, шулай ук җәяүлеләр зоналары киңәйтелгән һәм Түбән Кабан күле ягыннан велосипед юлы ясалган. Күпердә тышкы яктырту челтәрләренең яңа җайланмалары кулган, күпер конуслары, откослар һәм автомат су сибү системалары җиһазландырылган. Моннан тыш, хезмәткәрләр барьерлы һәм җәяүлеләр өчен койма урнаштырдылар», – дип сөйләде Мэрга Казан Башкарма комитеты җитәкчесе урынбасары Игорь Куляжев. 

Объектның төзелеш озынлыгы 436,5 м тәшкил итә. Юл киемнәре 15 587 кв.м урнаштырылган, 1 786 м борт ташлары монтажланган. Шулай ук күпер буйлап яшелләндерү үткәрелгән, газон чәчелгән һәм агачлар утыртылган, 60 светодиодлы яктырткыч урнаштырылган. Күпердә исәпләнгән тизлек сәгатенә 70 км тәшкил итәчәк. 

«Барысы да заманча таләпләр буенча эшләнгән. Күпер берьюлы берничә урамны бушатырга мөмкинлек бирә: Танк, Татарстан һәм Назарбаев урамнары», - дип өстәде Игорь Куляжев. 

Башта ремонтны киләсе елда гына тәмамлау планлаштырылган иде, әмма тәүлек әйләнәсе эшләү нәтиҗәсендә сроклар 2023 елның октябренә күчерелде. 

Исегезгә төшерәбез, 2019 елда объектта тикшерү үткәрелгән, нәтиҗәдә күпернең авария хәлендәге булуы ачыкланган. Башта авыр техника хәрәкәтенә чикләү кертелә, аннары җәяүлеләр өлеше сүтелә һәм электр белән тәэмин итү челтәрләре үзгәртеп корыла. Әмма эшчеләр туфракның утыруы аркасында конструкциянең куркыныч деформациясен күргәннәр, шуңа күрә 2022 елның сентябрь ахырында күпер тулысынча хәрәкәт өчен ябылган. 

Транспорт агымын туктатмас өчен, Казан халкының һәм кунакларның уңайлылыгы өчен Транспорт комитеты ЮХИДИ белән берлектә Түбән Кабан яр буендагы күперне һәм Һади Такташ урамын тоташтыручы тротуар ачты. Ә машина йөртүчеләр һәм пассажирлар өчен, шул исәптән җәмәгать транспорты өчен дә урау юллар схемасын килештерделәр.  

Агымдагы елда Казанда беренче тапкыр бер үк вакытта алты күпердә эшләр алып барыла. Эшләр Миллениумда, Күзәмәт, Борисоглебский һәм Киндери поселокларында бара, ә Отарда Монастырь ермага аша яңа күпер барлыкка киләчәк. 

Күчмә киңәшмәдә Казанның Вахитов һәм Идел буе районнары администрациясе башлыгы Альберт Салихов һәм «Волга-Автодор» ҖЧҖ подряд оешмасы директоры Станислав Шевырев та катнашты.