Татарстан башкаласында җәмигъ мәчете төзеләчәк урынга нигез ташы салынды

(Казан шәһәре KZN.RU, 20 нче май). Бүген Казанда Идел буе Болгар дәүләтендә ислам динен кабул итүгә 1100 ел тулуны бәйрәм итү кысаларында җәмигъ мәчете төзелешенә нигез ташы салу тантанасы булды. 

Чарада РФ Хөкүмәте Рәисе урынбасары Марат Хөснуллин, Татарстан Президенты Рөстәм Миңнеханов, ТР Дәүләт Киңәшчесе Минтимер Шәймиев, Россия Президентының Идел буе федераль округындагы тулы вәкаләтле вәкиле Игорь Комаров, Казан Мэры Илсур Метшин һәм Идел буе Болгар дәүләтендә ислам динен кабул итүнең 1100 еллыгын бәйрәм итүдә катнашу өчен килгән башка кунаклар катнашты.

Р.Миңнеханов җәмигъ мәчетенең иң яхшы проектына Халыкара конкурс башланды инде, һәм якын арада тәкъдим ителгән барлык вариантлар да каралачак дип билгеләп үтте. «Мәчетнең архитектурасы безнең күп гасырлык үзенчәлекле мәдәниятебезне чагылдырырга, мәһабәт һәм аерылып торырлык булырга тиеш», – дип ассызыклады ул.

Ул билгеләп үткәнчә, мәчет иҗтимагый иганәләргә төзеләчәк. Акча җыю белән «Игелек – Доброта» хәйрия фонды шөгыльләнәчәк. «Һәр теләгән кеше бу изге эшкә үз өлешен кертә ала», – дип өстәде ТР Президенты.

Моннан тыш, М.Хөснуллин 922 елда татарларның ата-бабалары ислам динен кабул итеп, киләчәкне хәл итте, дип билгеләп үтте. «Бу аларның мәдәни, икътисади һәм сәяси үсеше өчен көчле этәргеч булды», - диде ул.

Җәмигъ мәчетен Казан Кремле каршында элеккеге «Кырлай» паркы территориясендә торгызачаклар. Мәчет төзелеше Идел буе Болгар дәүләтендә ислам динен кабул итүгә 1100 ел тулуны бәйрәм итүгә әзерлек һәм аны үткәрү буенча төп чараларның федераль Планына кертелгән. ТР Президенты матбугат хезмәте хәбәр иткәнчә, әлеге эшне ТР мөселманнары Диния нәзарәте аша Татарстан мөселманнары җәмгыяте башлап җибәргән.

Фоторепортаж

Видеорепортаж