Казанга Төрекмәнстан Президенты Корбануглы Бәрдымөхәммәдов килде

Аэропортта Төрекмәнстан  президентын Рөстәм Миңнеханов, Илдар Халиков һәм Илсур Метшин каршы алды.

(KZN.RU, 16-нче май). Кичә "Казан" халыкара һава аланында аны Татарстан Президенты Рөстәм Миңнеханов, Татарстан Премьер-министры Илдар Халиков, Казан шәһәре Мэры Илсур Метшин, "Татнефть" ААҖ генераль директоры Шәфәгать Тәхаветдинов, "КАМАЗ" ААҖ генераль директоры Сергей Когогин, Татарстандагы төрекмән диаспорасы вәкилләре, шулай ук, Казан югары уку йортларында белем алучы төрекмән студентлары каршы алды.

Татарстан башлыгы Рөстәм Миңнеханов Корбануглы Бәрдымөхәммәдовны кайнар сәламләде. Татар милли киемнәрен кигән кызлар иң элек чәк-чәк белән сыйлады, соңыннан ак розалар бәйләмен бүләк итте.

Иртәгә Төрекмәнстан Президенты программасында Татарстан җитәкчелеге белән очрашулар, Казан Кремленә бару, IT-парк эшчәнлеге белән танышу, "Татарстанның мәдәни мирасы: борынгы Болгар каласы һәм Зөя шәһәр утравы" проектын тәкъдим итүдә катнашулар көтә.

Моннан кала, иртәгә хезмәттәшлек турында меморандум имзаланыр дип көтелә, дип хәбәр итә Татарстан Республикасы Президенты матбугат хезмәте.