ТР Президенты Казансу елгасының ике яңа участогын төзекләндерү нәтиҗәләрен бәяләде

(Казан шәһәре KZN.RU, 30-нчы август). Бүген Татарстан Президенты Рөстәм Миңнеханов, ТР Дәүләт Киңәшчесе Минтимер Шәймиев, Казан Мэры Илсур Метшин һәм РФ Төзелеш һәм торак-коммуналь хуҗалык министры урынбасары Никита Стасишин Казансу елгасы ярының ике төзекләндерелгән участогын карады. ТР Милли китапханәсеннән Миллениум күперенә һәм Казан Кремленнән Киров дамбасына кадәр территорияләрдә эшләр Казансу елгасы ярын үстерү стратегиясе кысаларында алып барылды.

Беренче өлештә – ТР Милли китапханәсеннән Миллениум күперенә кадәр – футбол, пляж волейболы һәм петанк уеннары өчен спорт мәйданчыклары төзелгән. Моннан тыш, Подлужная урамыннан тагын дүрт яңа юл ачылды.

Яр буен карау барышында кунакларга «Елга капкалары» аудио-инсталляция проектын тәкъдир иттеләр. Махсус мәйданчыкларда казанлылар ял итә һәм Казансу елгасы һәм шәһәрнең танылган кешеләре турындагы тарихларга нигезләнгән кечкенә генә аудиоспектакль тыңлый алачак.

Аннары Рөстәм Миңнеханов, Минтимер Шәймиев, Илсур Метшин һәм башка кунаклар Кремльдән Киров дамбасына кадәр яр буе участогында булдылар. Биредә су буенда уңайлы җәяүлеләр зоналары, ял итү урыннары булган яшел амфитеатр оештырылган, эскәмияләр һәм шезлонглар урнаштырылган, яшелләндерү эшләре үткәрелгән, дип хәбәр итә ТР Президенты матбугат хезмәте.

Элегрәк Казансу яр буеның киләсе участокларын проектлаштыру дәвам итәчәге билгеле булды. Бу елга ярларында беренче шәһәр паркын төзергә мөмкинлек бирәчәк, экология, төзекләндерү һәм шәһәр мохитенең сыйфаты турында кайгыртачак, шулай ук халыкны савыктыруга ярдәм итәчәк.

Фоторепортаж

Видеорепортаж