Казан мәктәпләрендә рус теле, математика һәм физика укытучыларына ихтыяҗ зур

(Казан шәһәре KZN.RU, 26-нчы август, Алинә Бережная). Узган уку елында Казан мәгариф учреждениеләренә 400 яшь белгеч килгән, әмма шәһәр мәктәпләрендә кадрлар җитмәү саклана. Иң ихтыяҗлысы башлангыч сыйныф, математика, рус теле һәм физика укытучылары. Бу хакта бүген «Арт Сити» торак комплексында урнашкан «Унбер» яңа мәктәбендә узган педагогик хезмәткәрләрнең традицион август киңәшмәсендә Мәгариф идарәсе җитәкчесе Ирек Ризванов сөйләде.

Казан Мэры Илсур Метшин укытучы һөнәренең абруен күтәрү кирәклеген ассызыклады. «Кадрлар җитмәү проблемасы актуаль булып кала бирә, һәм безнең уртак бурыч – укытучы һөнәренең абруен күтәрү, безнең мәктәпләрне тәмамлаучылар арасында һөнәри юнәлеш алу, бигрәк тә тумыштан килгән педагогик талант, лидерлык сыйфатлары, актив тормыш позициясе булган кешеләр», - диде шәһәр башлыгы.

Ирек Ризванов хәбәр иткәнчә, мәгариф оешмалары җитәкчеләренең Казан һәм Арча педагогика көллиятләре, шулай ук Казан федераль университеты белән хезмәттәшлеге җайга салынган. «Ел саен мәктәпләрне тәмамлаучыларның педагогик белгечлекләргә максатчан кабул итү кысаларында укырга керергә дәгъва кылучы исемлекләре төзелә», - дип сөйләде Мәгариф идарәсе башлыгы. Ул мәктәпнең педагогик коллективларын, шәһәрнең педагогик командасына кушылу өчен, максатчан укыту мөмкинлеге турында чыгарылыш сыйныф укучыларына мәгълүмат бирү эшен көчәйтергә чакырды.

ТР мәгариф һәм фән министры Илсур Һадиуллин ассызыклаганча, мәктәпләрдә укучы балаларның олимпиадаларда җиңүләре һәм укудагы нәтиҗәләре кадрларга бәйле. «Педагоглар миссиясе – балаларны тәрбияләү. «Кадрлар барысын да хәл итә, әгәр коллективта яхшы инфраструктурада югары квалификацияле белгечләр булмаса, мәктәпнең яхшы нәтиҗәләре булмаячак», – дип ассызыклады ул.

Кадрлар җитмәүгә карамастан, Казан педагогларының һөнәри конкурсларда җиңүләре саны арта. Аерым алганда, 311-нче номерлы балалар бакчасының музыка җитәкчесе Юрий Шулятьев «Ел тәрбиячесе» конкурсында илнең иң яхшы 15 тәрбиячесе рәтенә керде. «Йөрәгемне балаларга бирәм» Бөтенроссия педагогик осталык конкурсында өстәмә белем бирү педагогы Анна Григорьева абсолют җиңүче дип танылды, ә скаут оешмасы җитәкчесе Аида Горбунова туган якны өйрәнү номинациясендә өченче урынны яулады. 172-нче номерлы мәктәпнең тәрбия эшләре буенча директор урынбасары Вероника Державина «Кешене тәрбияләү» бөтенроссия конкурсында беренче урынны алды.

Ирек Ризванов сентябрьдә «Ел укытучысы» конкурсының бөтенроссия этабы узачагын искәртте. Быел Татарстан республика этабында абсолют җиңүче – 122-нче номерлы гимназиянең инглиз теле укытучысы Мария Голованова. Октябрьдә «Кешене тәрбияләү» номинациясендә бөтенроссия һөнәри осталык конкурсында Татарстан иң яхшы сыйныф җитәкчеләре арасында республика этабында җиңүче – 182-нче номерлы лицей педагогы Алия Хисамбеева, ә «Педагогик дебют» конкурсында Казан 102-нче номерлы гимназиясенең  педагогы Анастасия Сотникова чыгыш ясаячак.

Фоторепортаж