Казан мәктәпләрен саклауны республика һәм шәһәр бюджетларыннан финанслаячаклар

(Казан шәһәре KZN.RU, 26-нчы август, Алинә Бережная). Казан мәктәпләрен сак белән тәэмин итүгә республика һәм шәһәр бюджетларыннан акчалар бүленәчәк. Бу хакта бүген «Арт Сити» торак комплексында урнашкан «Унбер» яңа мәктәбендә узган мәгариф хезмәткәрләренең август киңәшмәсендә Казан Мэры Илсур Метшин белдерде.

«11-нче майда булган фаҗига безнең барыбызны да тетрәндерде. Мондый вакыйгаларны алдан кисәтү мөмкин булмаса да, без сезнең белән мәктәп һәм балалар бакчалары һәр бала һәм педагог өчен куркынычсыз мохит булсын өчен барлык кирәкле чараларны күрергә тиеш», – дип ассызыклады Мэр.

Шәһәр башлыгы билгеләп үткәнчә, уку елы башына социаль-мәдәни өлкә объектларының иминлеген тәэмин итү чараларына быел 200 млн сумнан артык акча чыгарылган. Алар террорчылыкка каршы саклану, саклау һәм янгын сигнализациясе, экстрен хәбәр итү, контроль һәм керү мөмкинлеге белән идарә итү системаларын урнаштыруга юнәлтелгән иде.

Илсур Метшин хәбәр иткәнчә, 175-нче номерлы гимназиядә булган фаҗигадән соң ил Президенты Владимир Путин РФ Хөкүмәтенә, төбәкләргә һәм җирле хакимиятләргә мәгариф учреждениеләрен саклауның бердәм стандартын эшләүне йөкләде.

«Куркынычсызлыкның барлык норматив таләпләрен үтәү һәм контроль органнарының барлык кисәтүләрен бетерү өчен безгә 2 млрд сум тирәсе акча таләп ителә, әмма андый акчалар юк, – дип билгеләп үтте Илсур Метшин. – Бу сорау үзенең комплекслы карарын табар дип ышанабыз. Әлегә исә без куркынычсызлыкны төбәк һәм шәһәр бюджетлары көчләре белән тәэмин итәчәкбез». Агымдагы уку елына республика бюджетыннан акчалар беренче һәм икенче категория мәктәпләрнең куркынычсызлыгын тәэмин итүгә юнәлдереләчәк, өченче һәм дүртенче категория мәктәпләр өчен акча шәһәр бюджетыннан табылачак.

Уку йортларына категорияләр террористик акт кылу куркынычы дәрәҗәсенә карап бирелә.