Казан Мэры: «Җирдән файдалану һәм төзелеш алып бару кагыйдәләре – шәһәр төзелеше комплексының өченче ноктасы»

(Казан шәһәре KZN.RU, 16-нчы август, Алинә Бережная). Бүген Казан шәһәре Думасы депутатлары җирдән файдалану һәм төзелеш буенча яңа кагыйдәләрне раслады. Алар Казанның актуаль шәһәр төзелеше документлары комплексының состав өлеше булып тора, дип билгеләп үтте Казан шәһәре Думасының VIII сессиясендә Казан Мэры Илсур Метшин.

«Без шәһәр төзелеше комплексының өченче ноктасын раслыйбыз. Генераль план, шәһәр төзелешен проектлауның җирле нормативлары һәм җирдән файдалану һәм төзелеш кагыйдәләре – шәһәр төзелеше тәртибен һәм юнәлешен билгели торган документлар. Кагыйдәләр Казанда төзеләчәк объектларның планировкасы проектларын, урнаштыру схемаларын һәм параметрларын эшләү өчен нигез булып тора», – дип билгеләде Илсур Метшин.

Шәһәр башлыгы ассызыклаганча, бүген Татарстан башкаласында төзүчеләр өчен максималь уңайлы шартлар тудырылган. «Без төзелеш тармагы өчен уен кагыйдәләрен урнаштырдык һәм Казан янә беренчеләр рәтендә, дип кыю рәвештә раслый алабыз. Шәһәргә килгән һәр инвестор җирләрне файдалануның перспектив юнәлешләрен, мөмкин булган төрләрен күрә ала», – дип билгеләп үтте Мэр. Шул ук вакытта шәһәрдә төзелеш форматы да үзгәрде. «Безнең эш беренче чиратта һәр казанлының тормышына йогынты ясаячак. Торак комплекслары проектларын раслаганда, без барлык кирәкле инфраструктураны – парковкалардан алып балалар бакчаларына кадәр күздә тотабыз», – дип искәртте Илсур Метшин.

Депутатларга җирдән файдалану һәм төзелешнең яңа кагыйдәләре турында шәһәрнең баш архитекторы урынбасары Тимур Кадыйров сөйләде. Алдагы документ 1998 елда төзелгән картага нигезләнгән иде. Агымдагы редакциягә шәһәр төзелешен зоналаштыру карталарына да, шәһәр төзелеше регламентларына да кагылышлы үзгәрешләр кертелде. Җирдән файдалануның һәм төзелешнең яңа кагыйдәләрендә территориаль зоналарның составы һәм чикләре шактый эшкәртелде. Зоналарның саны артты – 19-дан 27-гә кадәр. Шулай ук шәһәр төзелешен җайга салуның яңа механизмы барлыкка килде – территориаль зоналарның ярдәмче зоналары.

Тимур Кадыйров сүзләренә караганда, сессиядә расланган җирдән файдалану һәм төзелеш алып бару кагыйдәләре редакциясенең иң мөһим яңалыкларының берсе – торак объектларына гына түгел, җир кишәрлекләреннән файдалануның рөхсәт ителгән барлык төрләренә карата да параметрлар билгеләү.

Моннан тыш, яңа документта территориаль зоналар кертелгән, алар шәһәр мохитенең барлык потенциаль төрлелеген исәпкә ала һәм стимуллаштыра. Алар арасында иҗтимагый-эшлекле, иҗтимагый-торак һәм иҗтимагый-җитештерү зоналары бар. «Мондый территориаль зоналар мөмкинлекләрнең киңрәк спектрын, ягъни рөхсәт ителгән файдалану төрләрен, бигрәк тә иҗтимагый билгеләнештәге төрләрен күздә тота, бу территориядә өстенлекле функцияне билгеләргә мөмкинлек бирәчәк», – дип аңлатты Тимур Кадыйров.

Моннан тыш, яңа кагыйдәләр территорияне планлаштыру проектын мәҗбүри эшләүне таләп итә торган фактта файдалану зонасы барлыкка килүне күздә тота. «Фактта куллану рөхсәт ителгән куллану төрләре сыйфатында инде гамәлгә ашырылган һәм ЕГРН мәгълүматлары нигезендә шул ук параметрларда билгеләнә дигән сүз», – дип билгеләде Тимур Кадыйров. Территорияне планлаштыру проекты эшләнгәннән соң территория яңадан зоналанырга тиеш.

Җирдән файдалануның һәм төзелешнең яңа кагыйдәләре проектын раслау өчен барлык кирәкле этаплар узды, дип ассызыклады Казанның баш архитекторы урынбасары. Иҗтимагый фикер алышулар этапларның берсе булды. «Экспозиция барышында 87 сорау һәм иҗтимагый фикер алышуларда катнашучылардан 490 искәрмә һәм тәкъдим керде. Анализ нәтиҗәләре буенча 82 тәкъдимне исәпкә алырга тәкъдим ителде, 113 тәкъдим өлешчә исәпкә алынды», – дип искәртте Тимур Кадыйров.

Җәмәгать тыңлауларыннан соң җирдән файдалану һәм төзелеш алып бару кагыйдәләренә әзерләнү комиссиясенең өч утырышы уздырылды, соңгысы бу елның 24-нче июнендә булды.

Казан шәһәре Думасының шәһәр төзелеше һәм торак-коммуналь хуҗалык буенча даими комиссиясе рәисе Эмиль Хөснетдинов ассызыклаганча, яңа документ төзүчеләрнең дә, халыкның да мәнфәгатьләрен исәпкә ала. «Кагыйдәләрне эшләү халыкны һәм төзүчеләрне җәлеп итү белән алып барылды – бу каршылыкларны һәм җитешсезлекләрне юкка чыгара. Элеккеге документ картографик материаллар күзлегеннән генә түгел, кагыйдәләр үзләре дә искерде, без хәзер шәһәрнең шәһәр төзелеше сәясәтен озак елларга билгеләүче яңа адым ясыйбыз», – дип билгеләде ул.

Җирдән файдалану һәм төзелеш алып бару кагыйдәләрен расланганнан соң территориаль зоналарның чикләрен кадастр исәбенә кую, шулай ук расланган кагыйдәләрне территориаль планлаштыруның дәүләт мәгълүмат системасына һәм комплекслы муниципаль геомәгълүмат системасына йөкләү күздә тотыла.