Илсур Метшин Махсус Олимпиаданың Бөтендөнья кышкы Уеннарына әзерлек буенча киңәшмә уздырды

(Казан шәһәре KZN.RU, 23-нче июль, Камилә Гобәйдуллина). Казан Башкарма комитетында 2022 елда Татарстан башкаласында узачак һәм Россиядә Special Olympics International эгидасы астында беренче халыкара чара булачак Махсус Олимпиаданың Бөтендөнья кышкы уеннарына әзерлек турында фикер алыштылар. Киңәшмәне шәһәр Мэры Илсур Метшин уздырды.

Соңгы гаризалар буенча Махсус Олимпиаданың Бөтендөнья кышкы уеннарында 3 мең делегация әгъзасы, шул исәптән 99 илдән интеллектуаль үсеш үзенчәлекләре булган 2 меңләп атлет һәм юнифайд-партнерлар катнашачак, дип хәбәр итте Татарстанның спорт министры Владимир Леонов. Хәзерге вакытта спорт программасы тулысынча формалаштырылган һәм берничә сынау чарасы үткәрелгән. Казанның биш объектында җиде спорт төре буенча ярышлар узачак: кар өстендә йөгерү, тау чаңгысы спорты, сноуборд, флорбол, чаңгы ярышлары, тимераякта фигуралы шуу һәм тимераякта шуу спорты буенча.

Махсус Олимпиаданың Бөтендөнья кышкы уеннарын ачуга багышланган беренче чараларның берсе 6-нчы июль көнне узды.  Ярышларга кадәр 200 көн кала Бауман урамында Махсус Олимпиаданың Бөтендөнья кышкы уеннары башланганчы кире исәпләү стеласы ачылды.

Гомумән, чарага әзерлек штат режимында бара, дип билгеләп үтте Спорт һәм социаль проектлар дирекциясе генераль директоры Максим Денисов. Ул шулай ук мәдәни программаны әзерләү турында сөйләде, шул исәптән «Татнефть Арена»да узачак Махсус Олимпиаданың Бөтендөнья кышкы уеннарын ачу һәм ябу тантаналары турында. Тантананың режиссер –куючысы Алексей Сеченов, ул шулай ук 2013 елгы Универсиадага һәм 2015 елгы су спорт төрләре буенча дөнья чемпионатына матур тамаша әзерләгән булган. А.Сеченов сүзләренә караганда, Махсус Олимпиаданың Бөтендөнья кышкы уеннарын ачу тантанасында тамашачылар турыдан-туры эфирда ут эстафетасының финалын күрә алачак, ә тамашаның темасы – бер-береңне аңлау, кабул итү һәм инклюзия булачак.

Киңәшмәдә шулай ук Казан Башкарма комитеты җитәкчесе Рөстәм Гафаров, Башкарма комитет җитәкчесе урынбасары Игорь Куляжев, Башкарма комитет җитәкчесе урынбасары, социаль өлкә мәсьәләләрен алып баручы Гүзәл Сәгыйтова, Мәдәният идарәсе башлыгы Азат Абзалов, Физик культура һәм спорт комитеты рәисе Альберт Салихов катнашты.

Элегрәк билгеле булганча, Казанда Идел буе дәүләт физик культура, спорт һәм туризм университеты базасында 2022 елгы Махсус Олимпиаданың Бөтендөнья кышкы уеннары волонтерлары Рекрутинглау үзәге ачылды. Чараны уздыруга 2250 кеше җәлеп итү планлаштырыла. Ярдәмчеләрне сайлап алу 2021 елның октябрендә тәмамланачак, аннары аларны укыту башланачак.

Исегезгә төшерәбез, Махсус Олимпиаданың халыкара хәрәкәтенә 1968 елда нигез салынган. 1989 елга кадәр ярышлар АКШта гына узган. Махсус Олимпиада уеннары һәр ике ел саен, чиратлашып, җәйге һәм кышкы чорда үткәрелә һәм бөтен дөнья буйлап трансляцияләнә. Алдагы ярышлар Австриядә (2017), АКШта (2015), Көньяк Кореядә (2013), Грециядә (2011) узды.