И.Метшин: «Шәһәр хакимиятенең эше – спорт белән шөгыльләнү өчен тиешле шартлар тудыру»

(Казан шәһәре KZN.RU, 10-нчы ноябрь, Алена Мирошниченко). Казан Мэры Илсур Метшин бүген Авиатөзелеш районындагы «Мотор» спорт мәктәбенең төзекләндерелгән бинасын карады һәм аның директоры белән киләчәктә мәктәпкә үзгәрешләр кертү турында сөйләште. Октябрь башында биредә капремонт тәмамланды, аның барышында яңа чишенү бүлмәләре, душ, административ бүлмәләр һәм тренерлык бүлмәләре генә түгел, ә уникаль скалодром да барлыкка килде. Кыя тауга менүнең яңа бүлегенә 130 бала инде кабул ителгән. Җиһазлар дәресләр генә түгел, шәһәр һәм республика ярышларын да уздырырга мөмкинлек бирә. Киләсе елда спорт мәктәбе территориясендә футбол кырын яңарту һәм җиңел атлетика юлларын төзекләндерү планлаштырыла.

Казанның иң борынгы спорт мәктәпләренең берсендә капиталь ремонт февральдә башланган. Эшләрнең төп өлеше 1949 елда ук моторлар төзү заводы базасында төзелгән иске бинада (КМПО) үткәрелгән. Анда түбә, фасад, уен залы, чишенү бүлмәләре, административ бүлмәләр төзекләндерелде, инженерлык челтәрләре алыштырылды, спорт инвентарьлары яңартылды. Моннан тыш, 1985 елда төзелгән мәктәпнең икенче корпусы фасадын төзекләндерделәр.

Реконструкция барышында спорт учреждениесенең проект куәте арткан, барлык биналарның да диярлек сыйдырышлылыгы зурайган, шул исәптән ике чишенеп-киенү урынының да – аларның һәркайсы 15 кешегә исәпләнгән.

Спорт мәктәбен капиталь ремонттан соң скалодром белән җиһазландырдылар. Бу учреждение базасында кыяга үрмәләү бүлеге ачарга мөмкинлек бирде, анда инде хәзер 130 бала шөгыльләнә. «Казан өчен бу уникаль мәйданчык, – дип ассызыклады кыяга үрмәләү буенча тренер Евгения Вәлиева. – Ул монда шактый оригиналь аркан конструкциясе булуы белән аерылып тора, ул трассаны озынайтырга мөмкинлек бирә. Тагын бер зур плюс – спортчыга нәтиҗәле тирбәлергә, катлаулы техник элементлар ясарга, координацион һәм динамик хәрәкәтләр ясарга ярдәм итә торган асылмалы өслекләр».

Тренер сүзләренчә, спорт мәктәбендә кыяга үрмәләү белән шөгыльләнү мөмкинлеге – алга таба бик зур адым, бүген бу төр – Европада популяр спорт төрләренең берсе, дәресләр вакытында барлык мускуллар җәлеп ителә. Казанда көчле спортчылар шактый күп, әмма элек үсеш өчен тулы кыйммәтле инфраструктура булмады, чөнки күнекмәләр мәктәп секцияләрендә генә узды, дип сөйләде Е.Вәлиева.

«Мотор» спорт мәктәбендә тагын бер мөһим юнәлеш – футбол. Бу спорт төре белән биредә 256 кеше шөгыльләнә, күнекмәләр сигез төрле яшь төркемендә уза. Футбол буенча тренер Рәшит Гайнуллин шәһәр башлыгына хәзер «Мотор» спорт мәктәбендә балалар өчен идеаль шартлар тудырылган, дип сөйләде. «Футбол белән кызыксыну елдан-ел арта. Шартлар яхшыру белән, ата-аналар моны күреп алалар һәм балаларны дәрескә алып киләләр», – дип билгеләп үтте ул. Илсур Метшин бу юнәлештә эш дәвам итәчәк, дип ышандырды. Киләсе елда спорт мәктәбе территориясендә футбол кырын яңарту һәм җиңел атлетика юлларын төзекләндерү планлаштырыла.

Әйтергә кирәк, Казанда яңа федераль стандартларга туры килү максатларында балалар спорт мәктәпләрен масштаблы үзгәртеп кору проекты эшләнде. Гамәлдәге 29 муниципаль учреждение базасында спортның аерым төрләре буенча махсус спорт мәктәпләре төзелә. Әйтик, «Мотор» спорт мәктәбе бинасында футбол, кыяга үрмәләү, бокс, брейкинг һәм дзюдо буенча дәресләр уза. Әмма спорт мәктәбе хәзер үзе беренче һәм ике спорт төре буенча гына специальләшә.

Исегезгә төшерәбез, хәзерге вакытта Казанда 43 спорт мәктәбе эшли, анда 24,5 меңгә якын бала шөгыльләнә. Шул исәптән 29 учреждение – муниципаль, калганнары – республика һәм ведомстволарныкы. Моннан тыш, Физик культура һәм спорт комитеты 4 спорт-сәламәтләндерү комплексын җитәкли.

«Казанлыларның 50%-ы инде сәламәт яшәү рәвешен сайлый, актив һәм даими рәвештә спорт белән шөгыльләнә. Безнең эш, шәһәр хакимиятенең эше – моның өчен тиешле шартлар тудыру. Быел бюджет белән барлыкка килгән проблемаларга карамастан, без Мәскәү районындагы «Тасма» спорт мәктәбендә дә, Идел буе районындагы «Касатка» бассейнында да капиталь ремонт ясый алдык. Хәзер – Авиатөзелеш районындагы «Мотор». Без дәвам итәчәкбез, алда безнең футбол кыры һәм спорт инфраструктурасының башка объектлары», .– диде Илсур Метшин.

«Мотор» спорт мәктәбенең 70 еллык тарихы бар. Мәктәпне тәмамлаучыларның күбесе профессионаллар булды, Казанны һәм Татарстанны Россиядә һәм аннан читтә таныттылар. Хәзер мәктәптә 550 яшь спортчы, аларның яртысы диярлек футбол белән шөгыльләнә.

Чарада шулай ук башкарма комитетының физик культура һәм спорт комитеты рәисе Альберт Салихов, Авиатөзелеш һәм Яңа Савин районнары администрациясе башлыгының беренче урынбасары Наил Галиев катнашты.