И.Метшин: «Социаль челтәрләр ел фасылына караганда тизрәк үзгәрә, шуңа күрә авангардта калу мөһим»

(Казан шәһәре KZN.RU, 6-нчы май). «#ЖивувКазани: Казан мэриясе социаль медиа өлкәсендә» проекты «Ел матбугат хезмәте» ачык халыкара конкурсында «Социаль медиа өлкәсендә PR» номинациясендә беренче урынны алды, дип хәбәр итте бүген эшлекле дүшәмбе вакытында Казан шәһәр иҗтимагый үзәге директоры Диләрә Нуриева. Казан мэры Илсур Метшин билгеләп үткәнчә, социаль челтәрләр һәм рәсми шәһәр порталы шәһәр халкы белән элемтә урнаштырырга һәм төрле өлкәләргә караган төрле мәсьәләләрне бергәләп хәл итәргә мөмкинлек бирә. «Эшне дәвам итү һәм үзгәрешләрнең үзәгендә булу мөһим. Социаль челтәрләр ел фасылына караганда тизрәк үзгәрә, шуңа күрә авангардта калу мөһим», - дип ассызыклады ул.

«Ел матбугат хезмәте» конкурсы 2008 елдан бирле үткәрелә. Быел конкурска Россиянең төрле шәһәрләреннән, шулай ук Казахстан, Үзбәкстан һәм Белоруссия PR-агентлыкларыннан, матбугат хезмәтләреннән, PR-бүлекләрдән һәм бәйсез белгечләрдән 524 гариза бирелгән. 15 номинациянең һәрберсендә лидерлар өчлеге эксперт жюрие тарафыннан ябык тавыш бирү кысаларында билгеләнде. «Социаль медиа өлкәсендә PR» номинациясендә үзенчәлеклелек һәм тулыландыруның даимилеге, аккаунтларның формалаштырылуы һәм язылучылар белән аралашу бәяләнде. Җиңүчеләрне бүләкләү тантанасы Мәскәүдә узды.

«Казан шәһәре иҗтимагый үзәге алып бара торган проект бу өлкәдә әйдәп баручы экспертлар тарафыннан федераль дәрәҗәдә югары бәяләнде, - дип билгеләп үтте Д.Нуриева. - Казан Мэриясе белән беррәттән бу номинациядә коммерцияле җитештерү компанияләре, шулай ук Югра Хөкүмәте, РФ Мәгариф министрлыгы, Мәскәү Архсоветы гаризалары һәм башка төбәк дәрәҗәсендәге проектлар җиңүгә дәгъва итте».

Казан мэриясе 2016 елдан барлык төп социаль челтәрләрдә дә тәкъдим ителгән: «ВКонтакте», «Одноклассники», «Фейсбук», «Инстаграм», «Твиттер», дип искәртте Казан шәһәр иҗтимагый үзәге директоры. Спикер фикеренчә, мондый киң катлауда булу үзләре өчен уңайлы булган мәйданчыкларда халык белән аралашырга, мөһим вакыйгалар турында мөмкин кадәр күбрәк мәгълүмат бирергә, элемтәдә булырга һәм шәһәр халкының мөрәҗәгатьләренә җавап бирергә ярдәм итә.

«Без экспертларга югары бәя биргәннәре өчен рәхмәтлебез, әмма төп күрсәткеч – халыкның ышанычы, - диде Д.Нуриева. - «ВКонтакте» верификацияле паблигына 95 меңнән артык казанлы язылган инде. Эш дәвам итәчәк. Безнең мәйданчыкларда һәрвакыт мөһим яңалыклар табарга, актуаль сорауларга җавап алырга һәм шәһәр проектлары турында белергә була».

Соңгы проектларның берсе «Үлемсез полк» акциясенә багышланган, дип өстәде ул. Казан урамнарына бабалары һәм бабаларының әтиләре портретлары белән чыгучы шәһәр халкы аларның батырлыклары турындагы тарихлар белән уртаклаша, алар тиздән Мэриянең социаль челтәрләрендә һәм KZN.RU порталында урнаштырылачак.

Казан Мэры Илсур Метшин билгеләп үткәнчә, социаль челтәрләр һәм рәсми шәһәр порталы шәһәр халкы белән элемтә урнаштырырга һәм төрле өлкәләрдә – бизнес, торак коммуналь хуҗалык, транспорт реформаларында һәм башка юнәлешләрдә төрле мәсьәләләрне бергәләп хәл итәргә мөмкинлек бирә. «Бүген безнең шәһәр - төрле мәдәни, спорт, икътисади чаралар белән кайнап торган казанны хәтерләтә. Халык белән элемтә каналыбыз булуы мөһим. Бу - фикер алыша торган мәйданчык, - диде И.Метшин. - Тормыш шома гына бармый, проблемалы мәсьәләләр була, һәм безнең портал шәһәр халкына берничә төймәгә басу белән теге яки бу мәсьәләне хәл итү юлларын табарга мөмкинлек бирә, шуның аркасында кеше үз проблемасы белән күзгә-күз генә кала алмый».

Мэр шәһәрлеләрне Казан Мэриясенең социаль челтәрләренә язылырга чакырды һәм шуның аркасында казанлылар үз сорауларына тиз арада җавап ала һәм шәһәр тормышындагы мөһим яңалыкларны күзәтә алачак, дип билгеләп үтте.

Узган ел Казан Мэриясенең социаль медиа өлкәсендәге рәсми аккаунтлары Tagline Awards бүләге белән билгеләп үтелде - бу интерактив проектлар һәм диджитал өлкәсендәге казанышлар өчен Россиянең иң югары бүләге, дип өстәде Д.Нуриева.