Казанда Татарстан мөселманнарының VII корылтае узды

(Казан шәһәре KZN.RU, 17-нче апрель). Казанда Татарстан мөселманнарының VII корылтае узды. “Корстон” сәүдә күңел ачу комплексында узган чарада Татарстан Президенты Рөстәм Миңнеханов, Казан Мэры Илсур Метшин, республика буенча 1200 имам, министерстволар һәм ведомстволар җитәкчеләре, муниципаль берәмлек башлыклары катнашты.

Корылтай катнашучыларына беренче булып сәламләү сүзләре белән республика башлыгы мөрәҗәгать итте. Рөстәм Миңнеханов билгеләп үткәнчә, соңгы 4 елда республикада күп үзгәрешләр булды. Әмма эшнең төп нәтиҗәсе – төбәктә киләчәктә уңай якка үсешенең нигезе – милләтара һәм диниара татулык һәм тынычлык саклап калынды. «Бу эшкә Татарстан Мөселманнары Диния нәзарәте эшлеклеләре дә  зур өлеш кертте», - диде Рөстәм Миңнеханов.

Татарстан Республикасы Президенты билгеләп үткәнчә, бүген республикада динне, туган телне һәм гореф-гадәтләрне саклап калу өчен барлык кирәкле шартлар тудырылган. Аның сүзләренчә, гыйбадәт объектларын торгызуга зур игътибар бирелә. Шундыйлардан Галиев мәчете комплексы торгызылды.  

Хәзерге заман шартларында имамнар әзерләү аерым әһәмияткә ия, диде Рөстәм Миңнеханов. Бу олы мәсьәләне хәл итү максатларында, бүген Спас районында Болгар ислам академииясе төзелеше актив алып барыла. «Бу – федераль масштабтагы проект. Академия ислам кыйммәтләренә ярдәм күрсәтүче дини-мәгариф һәм рухани-мәгърифәт үзәге булачак», - диде Рөстәм Миңнеханов

Рөстәм Миңнеханов Камил хәзрәт Сәмыйгуллинның һәм тулаем мөфтият эшчәнлеген югары бәяләде. «Ышанам, без киләчәктә дә республикабыз кешеләренең уңайлы тормышы, тынычлык һәм татулык хакына бергәләп эшләрбез», - диде ТР Президенты, дип хәбәр ителә Татарстан Республикасы Хөкүмәтенең порталында.