Казанда грипп һәм ОРВИ белән авыру 73% ка арткан

(Казан шәһәре KZN.RU, 25 нче декабрь, Диана Жиленкова). Узган атна нәтиҗәләре буенча Казанда грипп һәм ОРВИ белән авыруның 21 мең 978 очрагы теркәлгән. Үсеш темпы 152 % тәшкил иткән. ТР башкаласында авыруның 50 нче атнасында авыру дәрәҗәсе эпидемия чигеннән 73% ка артып киткән. Бу хакта эшлекле дүшәмбедә ТР сәламәтлек саклау министры урынбасары – ТР Сәламәтлек саклау министрлыгының Казан буенча идарәсе башлыгы Владимир Жаворонков хәбәр итте.

«Кызганычка каршы, салкын тию авырулары буенча эпидемия чиге җитди үтте, – диде Мэр Илсур Метшин. - Бер-беребезне саклап калу өчен, коронавирус пандемиясе чикләүләре вакытында кулланган практикага кире кайтыйк. Роспотребнадзор бернинди чикләүләр кертми, һәм бу яхшы – без инде кирәкле чараларны үзебез күрә алабыз. Шуңа күрә үзләрен начар хис иткән кешеләргә мөрәҗәгать итәм: массакүләм чараларда катнашмасыннар, ә калганнар саклык чаралары күрсеннәр һәм профилактика белән шөгыльләнсеннәр».

Владимир Жаворонков сүзләренчә, бүгенге көндә госпиталь базасының тулы әзерлеге тәэмин ителгән. Бүгеннән алып махсус боерыкка кадәр шәһәрнең өлкәннәр һәм балалар поликлиникалары төн уртасына кадәр эшләячәк. Өйгә чакыруларны 21:00 сәгатькә кадәр кабул итәләр, алар буенча чыгуларны 22:00 сәгатькә кадәр башкаралар. Авыру белән бәйле хәл тотрыкланганнан соң, медицина учреждениеләре гадәти эш режимына күчереләчәк.

Элегрәк Россия кулланучылар күзәтчелегенең ТР буенча идарәсе җитәкчесе урынбасары Любовь Авдонина хәбәр иткәнчә, авыру структурасында А гриппы вирусы өстенлек итә. Сезон ахырына – февраль-март айларында – В тибы таралачак дип фаразлана. Вакцинацияне 1 млн 877 мең 150 кеше узган, бу республика халкының гомуми санының 46% ын тәшкил итә.