«Мин балаларны яратам, һәм алар миннән курыкмыйлар»: Игорь Крутой «Игелекле дулкын» фестивале турында

(Казан шәһәре KZN.RU, 22 нче сентябрь, Камилә Вилданова). Кичә «Пирамида» мәдәни-күңел ачу комплексында «Игелекле дулкын» фестиваленең гала-концерты узды. Анда Россия эстрадасы йолдызлары Игорь Крутой, Дима Билан, Лариса Долина, Burito һәм Сосо Павлиашвили белән бергә конкурс финалистлары чыгыш ясады. Концертны Вадим Такменев һәм Анна Янкина алып бара. Фестивальдә катнашучыларны һәм тамашачыларны Казан Мэры Илсур Метшин сәламләде.

«Хәерле кич, кадерле дуслар, катнашучылар. Без бишенче тапкыр кунакчыл Казанда «Игелекле дулкын» фестивалендә җыелабыз. Бу вакыт эчендә меңләгән авыр язмышлы балалар сәхнәгә чыгып, үз көчләрен сынап карадылар. Мин бу юлда безнең белән булган һәркемгә, беренче чиратта безнең дустыбыз, маэстро Игорь Яковлевич Крутойга рәхмәт белдерәсем килә. Балаларыбызга үз йөрәкләрен бүләк итүче артистларга рәхмәт. Кадерле әти-әниләр һәм катнашучылар, «Игелекле дулкын» мәңге яшәсен. Казанга рәхим итегез!», – диде ул.

«Казанга килү һәрвакыт шатлыклы! Бигрәк тә авыр тормышта яшәүче һәм фестивальдән соң үзләрен бөтенләй башкача хис итә башлаган балаларның хыялларын тормышка ашыру өчен «Игелекле дулкын»га килгәндә. Бу проект белән кызыксынуыгыз өчен сезгә, шулай ук Илсур Рәис улы һәм Татарстан Рәисе Рөстәм Миңнехановка зур рәхмәт», – дип ассызыклады Игорь Крутой.

Сайлап алу нәтиҗәләре буенча финалга 99 бала чыкты, шуларның 13 е – казанлылар. Һәр баланың үз язмышы бар, һәм алар үз үрнәкләре белән уңышка теләсә нинди шартларда да ирешеп була икәнен күрсәттеләр. Күп кенә катнашучылар фестиваль аларга чыннан да үз-үзләренә ышанырга ярдәм итте дип җиткерде. Йолдызлар белән бер сәхнәдә җырлау, дулкынлануга карамастан, алар өчен зур бәхет булды.

«Миңа барысы да ошады! Бүген Сосо Павлиашвили белән чыгыш ясадым. Башта борчылдым, аннары җыелдым һәм чыгыш ясауга шатландым! Фестиваль турында сөйләр сүз күп. Барысы да бик яхшы! Ул бик күп мөмкинлекләр бирә. Фестивальгә булганы өчен рәхмәт!», – үз тәэсирләре белән уртаклашты «Игелекле дулкын» катнашучысы Александр Данилов.

«Мин бүген Екатеринбургтан Настя исемле кыз белән чыгыш ясадым. Барысы да бик матур булды, мин чыгыш ясаганда хисләр гаммасын алдым. Фестиваль күп мөмкинлекләр бирде: мастер-классларда булдым, Казан буйлап йөрдем. Үзем Донецк өлкәсенең Макеевка шәһәреннән. Безнең хореографлар һәм режиссерлар белән аралашу аеруча кызыклы булды», - дип сөйләде фестиваль финалистларының берсе.

Филипп Фатфуллин да сәхнәдә үзен ышанычлы итеп тотты. Ул Лариса Долина һәм Burito белән бергә җырлады. Малай да дуслары белән килешүен, фестивальнең бик яхшы узуын ассызыклады.

«Игелекле дулкын» фестивале балаларга сәхнәдә йолдызлар белән чыгыш ясарга, шулай ук беркемне дә битараф калдырмаган авыр язмышлары белән дә уртаклашырга мөмкинлек бирде. Казаннан Әнисә Гарипова һәм аның әнисе ДЦП авыруы турында сөйләделәр. Әмма бу иҗат юлы өчен киртә булмаган. Моннан тыш, кыз хоккей белән актив шөгыльләнә һәм атларда йөрергә ярата. Мондый күнегүләр яхшы реабилитация булып тора, балалар ачыла һәм җәмгыятьтә үзләрен уңайрак хис итә. «Әгәр минем хоккейда берәр нәрсә килеп чыкмаса, мин кәефемне төшермим. Ахырга кадәр барам һәм үз алкамны кертәм. Бүген чыкмаса да, иртәгә килеп чыгачак», – дип сөйләде Әнисә.

Маргарита Викберг, Игорь Крутой белән бергә «Любовь уставших лебедей» җырын башкарып, күңелгә үтеп керерлек номер күрсәтте. Кызның күрү сәләте начар, шулай да бу аның вокалына комачауламый. Маргаританың матурлыгы һәм тавышының көче көчле алкышларга лаек булды.

«Мин балаларны яратам, алар миннән курыкмыйлар. Барысы да бик яхшы аңлый һәм минем белән дуэтта тыныч чыгыш ясый», – дип уртаклашты KZN.RU корреспонденты белән әңгәмәдә Игорь Крутой.

«Игелекле дулкын» хыялларны барлык сайлап алу этаплары дәвамында да тормышка ашыра. Илья Филлиповка 14 яшь. Хәзер малай балалар йортында яши. Барлык тәрбиячеләр дә аның турында уңай, беркайчан да төшенкелеккә бирелми торган кеше буларак сөйлиләр. Ильяс биергә ярата, һәм ул моны бик оста башкара. Хореограф малай башкарган аяк хәрәкәтләренең күбесен хәтта ул да эшли алмавын билгеләп үтә. Ильясның диңгезгә бару турында күптәнге хыялы булган, аны оештыручылар тормышка ашырган. Сочига сәяхәт кылганнар, анда аны пейзажлар әсир иткән, ул туйганчы аттракционнарда йөргән, ә иң мөһиме диңгезне күргән.

Концерт программасы Игорь Крутой һәм концертның барлык катнашучылары башкарган «Игелекле дулкын» гимны белән тәмамланды.

Исегезгә төшерәбез, «Игелекле дулкын» бөтенроссия балалар иҗаты мәдәни-хәйрия фестивале 2017 елда Татарстан башкаласы Мэры Илсур Метшин һәм Россиянең халык артисты Игорь Крутой инициативасы белән оештырылды. Фестиваль Мәдәни инициативалар Президент фонды, ТР Хөкүмәте һәм «Игелекле Казан» ярдәме белән үткәрелә. Оештыручылар булып шәһәр Мэриясе һәм Игорь Крутойның популяр музыка академиясе тора.

Быел фестивальдә катнашу өчен бөтен Россиядән 1,5 меңнән артык кеше гариза биргән, алар арасында ятим балалар, инвалидлык һәм сәламәтлек мөмкинлекләре чикләнгән балалар, шулай ук Луганск һәм Донецк республикалары халкы булган. Катнашучылар өч юнәлештә осталык күрсәттеләр: вокал, инструментта уйнау һәм хореография (шул исәптән ишарәләр белән җырлау). Сайлап алу турлары Казанда, Ярославльдә, Мәскәүдә, Краснодарда, Кемеровода, Екатеринбургта, Новосибирскида һәм Севастопольдә узды.