Балаларны яклау көне: Татарстан башкаласында нинди вакыйгалар узачак

(Казан шәһәре KZN.RU, 29 нчы май, Татьяна Марюхова). Казанда Балаларны яклау көне шәһәрнең барлык иҗтимагый киңлекләрендә билгеләп үтеләчәк. Вакыйгалар арасында Лядской бакчасында мода күрсәтү, Дәрвишләр бистәсендә «Бала-фест», «Әни белән бергә» лекциясе һәм башкалар бар. Бу хакта Мэриядә узган эшлекле дүшәмбедә шәһәр Башкарма комитетының Балалар һәм яшьләр эшләре комитеты рәисе Алия Заһидуллина хәбәр итте.

Аның сүзләренчә, бүген 16:00 сәгатьтә «Синең файдаңа» хәйрия фондының Симург балалар инклюзив ял үзәгенең театр студиясе премьерасы булачак. Тәрбияләнүчеләр өчен дәресләр Әкият курчак театры мәйданчыгында уза. Ә 1 нче июньдә иртәдән кичкә кадәр яшь казанлылар һәм Казан кунаклары музыка мәктәпләре, мәдәният сарайлары, шәһәр китапханәләре һәм башка оешмалар оештырган йөздән артык чарада катнаша алачак – бу концертлар, күргәзмәләр, асфальтта рәсем конкурслары, спорт ярышлары һәм флешмоблар. Алар «КазанДА – город счастливого детства» балалар җәйге ялының бердәм концепциясе буенча сайлап алынган.

Дәрвишләр бистәсендәге Сәетгалиев исемендәге сәдәният сарае янындагы паркта «Бала-фест» шәһәр балалар фестивале узачак. Көндезге сәгать 10 нан 12 гә кадәр интерактив мәйданчыклар эшләячәк: иҗади дартс, интеллектуаль һәм спорт-күңел ачу уеннары, зур домино һәм асфальтта рәсемнәр ясау.

Сосновая роща паркында концерт һәм мастер-класслар белән зур гаилә бәйрәме узачак.

Сәйдәш мәдәният үзәге «Һәрвакыт булсын кояш» бәйрәме мәйданчыгы булачак, ул 11:00 сәгатьтә башланачак.

13:00 сәгатьтә Калейдоскоп балалар паркында Константин Хабенский студиясеннән театраль попурри, крио-шоу һәм аквагрим узачак.

Ак чәчәкләр бульвары «Әни белән бергә» лекциясен тыңлаучыларын җыячак, анда теләгән һәркем уку күнекмәләре буенча киңәшләр ала алачак.

Яшь мода сөючеләр өчен Лядской бакчасында 18:00 сәгатьтә киемнәр күрсәтеләчәк. Урицкий паркы яшьләргә аниматорлар катнашында концерт программасы әзерләгән.

Крылья Советов паркында хип-хоп, спорт-бал биюләре, брейк-данс буенча мастер-класслар оештырылачак, ә 20:00 сәгатьтә шунда ук «Мэри Поппинс, до свидания!» совет фильм-мюзиклы күрсәтеләчәк.

Моңа кадәр KZN.RU порталы җәйге сәламәтләндерү кампаниясе башлануы турында хәбәр итте. Җәй көне 175 лагерь эшләячәк: 146 мәктәп яны, ике палаткалы һәм 27 шәһәр читендәге сәламәтләндерү лагерьлары, аларда 44 меңнән артык бала ял итәчәк.