Илсур Метшин Казанда чокырларны ремонтлау барышын тикшерде

(Казан шәһәре KZN.RU, 16 нчы март, Татьяна Марюхова). Бүген Казан Мэры Илсур Метшин Идел буе районында Фучик һәм Сафиуллин урамнары чатында чокырларны ремонтлау барышын тикшерде. Шәһәрдә эшләр дүшәмбе, 13 нче мартта башланды. Барлыгы 30 мең кв. м мәйданлы юл участокларын ремонтлау планлаштырыла.

Шәһәр башлыгы билгеләп үткәнчә, төрле элемтә каналлары аша Башкарма комитетка автомобиль хуҗаларыннан юлларның торышына шикаятьләр килә. «Без эшне апрельдән иртәрәк башларга мәҗбүр. 30 мең кв. метрга юл «пломбалар»ы куелачак. Бу – юл эшләре тулы көченә башланганчы кулланыла торган вакытлыча чара», - диде И.Метшин. Беренче чиратта чокырларны ремонтлау таләп ителгән юллар Казан халкының мөрәҗәгатьләре нигезендә сайланды, дип өстәде ул.

Мондый проблемалы участокларның берсе –автомобильчеләр зарланган Фучик һәм Сафиуллин урамнары кисешкән урын. Монда җәмәгать транспорты хәрәкәте интенсив һәм машиналар агымы зур, шуңа күрә барлыкка килгән чокырларны тутыруга юл эшчеләре ремонт башланганнан соң беренче атнада ук керештеләр. 

Хәзер, һава температурасы +5 градус урнашкач, эшләр сумаласыман сыек асфальт ярдәмендә башкарыла. Мәйданы 5 кв. м. кадәр булган тирән һәм авария тудырырга мөмкин чокырлар төзәтелә. 

Эшләр, транспорт хәрәкәтенә комачауламас өчен, тәүлекнең төнге вакытында алып барыла. «Көндез без чокырны эшкәртәбез һәм әзерлибез, ә инде кич белән аны сумаласыман асфальт белән тутырабыз. Һава температурасы +10 градуска кадәр күтәрелгәч, тыгыз кайнар асфальт-бетонга күчәчәкбез», - дип сөйләде Тышкы төзекләндерү комитеты рәисе Игорь Сәлахетдинов. 

Бүгенге көндә чокыр ремонтлары Тэцевская, Уң як Болак, Сул як Болак, Рихард Зорге, Химия, Петербург, Декабристлар һәм Горький шоссесы урамнарында үткәрелә. 

Төп урамнарда, күперләрдә, юл чишелешләрендә һәм юл үткәргечләрдә эшләр тәмамланганнан соң, белгечләр калган проблемалы участокларга керешәчәк. 

Күчмә киңәшмәдә шулай ук Вахитов һәм Идел буе районнары администрациясе башлыгы Альберт Салихов катнашты.