Илсур Метшин биналарның түбәләрен вакытында кардан чистартуны тикшереп торырга кушты

(Казан шәһәре KZN.RU, 6 нчы март, Диана Жиленкова). Казан Мэры Илсур Метшин Башкарма комитетта узган эшлекле дүшәмбе киңәшмәсендә биналарның түбәләрен вакытында кардан чистартуны тәэмин итүне йөкләде. Вәзгыятьне контрольдә тоту Административ-техник инспекция идарәсенә йөкләнгән.

«Бу көннәрдә кояш язгыча җылыта, без уңай температураларны да күзәтәбез. Шуңа күрә түбәләрне вакытында кардан чистартуга игътибар итү зур үтенечем», - диде И.Метшин киңәшмәдә. Ул шәһәр Башкарма комитеты җитәкчесе Рөстәм Гафаровны, район администрацияләре башлыкларын, ТКХ һәм төзекләндерү предприятиеләрен бу мәсьәләгә аерым игътибар бирергә һәм тиешле эшне оештырырга чакырды.

ТР Гидрометеорология үзәге фаразлавынча, иртәгә Казанда көндез -1-3 градуска кадәр җылытачак. Синоптиклар бераз кар, шул исәптән җепшек кар вәгъдә итәләр, юлларда бозлавык булырга мөмкин. Төнлә һава температурасы -5-7 градуска кадәр төшәчәк.

Исегезгә төшерәбез, ишегалларында кар чистарту өчен идарәче компанияләр һәм торак милекчеләре ширкәтләре җаваплы. Йорт яны территориясен чистарту сыйфаты гамәлдәге нормативларга туры килмәсә яки нинди дә булса сәбәпләр аркасында торак милекчеләрен канәгатьләндермәсә, алар идарәче оешмага мөрәҗәгать итә, «Ачык Казан»да гариза калдыра яки Дәүләт торак инспекциясенә шикаять бирә ала.