Бер ел эчендә Киров һәм Мәскәү районнарында 80 мең квадрат метрдан артык юл ремонтланган

(Казан шәһәре KZN.RU, 6 нчы март, Юлия Летникова). 2022 елда Казанның Киров һәм Мәскәү районнарында якынча 160 млн сумга 80 мең кв.метр юл ремонтланган. Өч урамда (Восход, Энергетиклар һәм Короленко) асфальтны «Имин сыйфатлы юллар» илкүләм проекты буенча яңарттылар. Горький шоссесын реконструкцияләү һәм магистраль дублерын төзү дәвам итә. Бу хакта шәһәр Башкарма комитетында узган аппарат киңәшмәсендә администрация башлыгы Сергей Миронов хәбәр итте.

«Узган ел Киров һәм Мәскәү районнары территориясендә күп кенә үзгәртеп корулар булды. Безгә кадәр эшләүчеләр хыялланган глобаль әйберләр арасында Горький шоссесын реконструкцияләү һәм магистраль дублерын төзү бар. Бу проектлар Киров һәм Мәскәү районнары өчен генә түгел, бөтен республика башкаласы өчен дә мөһим», – диде Казан Мэры Илсур Метшин. Ул реконструкциянең актив баруын билгеләп үтте. Шәһәр башлыгы республика җитәкчелегенә һәм федераль үзәккә урам-юл челтәрен үстерү программалары тормышка ашырырга ярдәм иткәннәре өчен рәхмәт белдерде.

Горький шоссесының беренче участогында эшләрне ел ахырында тәмамлау планлаштырыла. Бу вакытка Болотников, Фрунзе һәм Восстание урамнары кисешкән урында транспорт чишелеше ачылачак. 2025 елда 12 км озынлыктагы магистральне реконструкцияләүне тулысынча төгәлләргә ниятлиләр.

2022 елда Киров һәм Мәскәү районнарында Горький шоссесы дублеры төзелешенең беренче этабын (Несмелов урамыннан) тәмамладылар. Моннан тыш, Салават Күпереннән чыгу юлындагы тыгызлыкны бетерү өчен Осиново урамына реконструкция ясалды. Мэр билгеләп үткәнчә, транспорт ситуациясен яхшырту өчен Нурихан Фәттах урамын да киңәйтергә кирәк. «Проект әзер инде, әмма акча җитәрлек түгел, бу мәсьәләдә алга китеш булыр дип өметләнәбез», – дип билгеләде шәһәр башлыгы.