И.Метшин: «Белем бирү учреждениеләрен капиталь ремонтлау турында: «Тәҗрибә белән сыйфат һәм дөрес подрядчылар килә»

(Казан шәһәре KZN.RU, 6 нчы февраль, Диана Жиленкова). Быел Казанда 17 мәктәп, 4 балалар бакчасы һәм 21 мәктәп ашханәсенә капиталь ремонт ясалачак. Бүген эшлекле дүшәмбедә мәгариф оешмаларын яңарту планнары турында шәһәрнең Социаль өлкә учреждениеләрен карап тоту һәм хезмәт күрсәтү департаменты директоры Петр Королев хәбәр итте.

«Теләсә кайсы социаль учреждениене капиталь ремонтлауга караганда төзү җиңелрәк»

Казан Мэры Илсур Метшин, гадәттәгечә, шәһәрнең мәгариф учреждениеләрен ремонтлау буенча зур күләм башкаруын билгеләп үтте. «Быел без 17 мәктәпне һәм 4 балалар бакчасын ремонтларга планлаштырабыз, - дип ассызыклады ул. - Универсиада елында без параллель рәвештә 14 чишелеш, 40 җәяүлеләр кичүе, җир өсте һәм җир асты юлы, социаль объектлар төзүебез белән горурландык. Һәм без ул вакытта капиталь ремонт ясаган 20 мәктәп хыялларның иң югары ноктасы кебек тоелды», - диде Мэр.

2022 елда Татарстан Республикасы башкаласында 71 социаль объект яңартылды, шуларның 51 е – мәгариф учреждениеләре, дип ассызыклады шәһәр башлыгы. «Тәҗрибә белән сыйфат һәм дөрес подрядчылар килә. Теләсә кайсы социаль учреждениене капиталь ремонтлауга караганда төзү җиңелрәк – кайдадыр уку процессы туктамый, кайдадыр кыска вакыт эчендә эшләргә кирәк. Ремонт эшләренең сыйфаты тәҗрибә белән бергә үсә», - диде Мэр.

«Балалар һәм социаль учреждениеләрнең инфраструктурасын үстерү, аларны норматив халәттә карап тоту безнең өстенлекле бурычларның берсе булып тора, – дип дәвам итте Мэр. - 60 еллап капремонт күрмәгән учреждениеләр бар. 2012 елда 30 елдан артыграк эшләгән мәктәпләргә капиталь ремонт ясау инициативасы белән Татарстан Рәисе Рөстәм Миңнехановның программасы зур вакыйга булды. Әлеге программа ярдәмендә 106 мәктәптә иң үзәккә үткән мәсьәләләрне хәл итте. Бу – түбә, коммуникацияләр, торбалар, тәрәзәләр. Мәгарифне үстерү программасы, мәктәпләрне капиталь ремонтлау буенча федераль программа барлыкка килде. Әлеге ике программа ярдәмендә, ниһаять, ремонтланмаган социаль учреждениеләрдә дистәләгән еллар тупланган проблемаларны җиңәрбез дип өметләнәбез», – дип билгеләде Мэр.

Балалар бакчаларын ремонтлау буенча зур күләмдә эш башкарасы бар, диде Мэр. И.Метшин Серов урамында урнашкан 395 нче номерлы балалар бакчасын мисал итеп китерде. Шәһәр башлыгы җан җылысы һәм балаларга мәхәббәт белән эшләгән дизайнерларга һәм төзүчеләргә рәхмәт белдерде. «Администрация башлыгының яки Башкарма комитетның профиль бүлекчәсе җитәкчесенең шәхси катнашуы мөһим», - дип саный шәһәр башлыгы.

2022 елда өстәмә рәвештә 7 балалар бакчасы һәм 1 мәктәп ремонтланган

П.Королев сүзләренчә, Татарстан Республикасы башкаласында 74 мең бала 396 муниципаль балалар бакчасына йөри. Соңгы 5 елда шәһәрдә аларның 49 ы яңартылды. Республика программасы буенча 3 млрд сумлык эшләр башкарылган. 2022 елда капиталь ремонт 5 учреждениегә кагылды, быел 4 есендә эш тәмамланачак. 5 ел дәвамында учреждениеләрне яңарту ихтыяҗын тулысынча каплар өчен ел саен 37 бинага капиталь ремонт ясарга кирәк, дип билгеләп үтте спикер. 

«Проблеманың масштабын аңлап, узган ел республика һәм муниципаль бюджеттан софинанслау кысаларында 1 млрд сум бүлеп бирелгән иде, шуның аркасында без ел саен үткәрелә торган программага өстәмә рәвештә 7 балалар бакчасын һәм 1 мәктәпне ремонтлый алдык», – дип хәбәр итте П.Королев.

Әйтик, узган ел Четаев урамындагы 143 нче мәктәпне капиталь ремонтлаганнар. 1 нче сентябрьдә яңартылган учреждение бер мең укучы өчен ишекләрен ачты. Моңа кадәр 1991 елда төзелгән 9 мең кв.метрлы уку йортында 30 ел эчендә бер тапкыр да комплекслы ремонт үткәрелмәгән, бары тик агымдагы гына. Шулай ук мәгариф учреждениеләрен капиталь ремонтлау буенча яңа федераль программа буенча 2022 елда 131 нче лицей, 173 нче мәктәп һәм 18 нче гимназиягә капиталь ремонт ясалды.

2023 елда 16 мәктәпне «Мәгарифне үстерү» федераль программасы буенча ремонтлау планлаштырыла, аларның һәркайсына 135 млн сум каралган. Түбә, тәрәзә блоклары һәм керү төркемнәре, бинаның нигез кырлары, инженер челтәрләре, актлар һәм спорт заллары, профильле кабинетлар яңартылачак. Җиһазларны, мебель һәм инвентарьларны алыштыру планлаштырыла. Өстәмә рәвештә, ТР Рәисе кушуы буенча, быел 1964 елда төзелгән Совет районындагы 93 нче гимназиянең төп бинасын капиталь ремонтлаячаклар.

П.Королев сүзләренчә, 2024-2025 елларга федераль программа буенча ремонт эшләрен башкару өчен мәктәпләр исемлеге формалаштырылган инде.

Узган ел ТР башкаласында шулай ук 31 мәктәпнең азык-төлек блогы һәм төшке аш залы ремонтланган, моның өчен 297 млн сум бүлеп бирелгән. Мәктәп рестораны форматында 144 ашханә эшли инде – бу аларның гомуми саныннан 78% дигән сүз. «Бу балаларны тукландыру өчен бөтенләй яңа шартлар: заманча кухня җиһазлары, матур аш бүлмәләре, уңайлы мебель, утырту урыннары арту», – дип билгеләп үтте П.Королев. Аның сүзләренчә, быел 21 ашханәдә 220 млн сумга ремонт планлаштырылган.

Капремонт 100 ел элек төзелгән ике бинада башланды

П.Королев билгеләп үткәнчә, капиталь ремонт уздырганда биналары мәдәни мирас объектлары булган учреждениеләр аерым игътибар таләп итә. Аның сүзләренә караганда, 2022 елда эшләр 100 ел элек төзелгән 2 объектта башланган: Айвазовский урамындагы 73 нче мәктәп базасындагы «Факел» балалар иҗаты үзәгендә һәм Горький урамындагы 98 нче мәктәп каршындагы мәктәпара уку комбинатында. Объектларда түбәне ремонтлаганнар, түшәмәләрне яңартканнар һәм ныгытканнар, инженерлык коммуникацияләрен алыштырганнар. Эшләрне тәмамлау өчен якынча 392 млн сум кирәк булачак.

Нәтиҗә ясап, П.Королев 2022 елда шәһәр бюджеты ярдәме белән 213 мәгариф учреждениесендә 254 млн сумга агымдагы ремонт үткәрелүен өстәде. 22 объектта түбә ремонтланган, 38 ендә тәрәзә блоклары алмаштырылган, 40 ында эвакуация юллары җиһазландырылган, 113 ендә вак-төяк планлы ремонт үткәрелгән.

«2022 елда капиталь һәм агымдагы ремонт программаларын гамәлгә ашыру нәтиҗәсендә ремонт һәр икенче мәгариф учреждениесендә узды», – дип билгеләп үтте спикер.

Моннан тыш, белем бирү учреждениеләрендә куркынычсызлык көчәйтелде. 2022 елда 271 объектта гомуми озынлыгы 75 км булган коймаларны алыштырганнар. Куркынычсызлыкның беренче категорияле объектларында тикшерү-үткәрү пунктлары һәм тизлекне киметү чаралары бар. 175 учреждениедә саклау пунктлары җиһазландырылган, дип сүзен йомгаклады П.Королев.