Казанда «Салават күпере»ндә гимнастика үзәген һәм «Весна» торак комплексында баскетбол үзәген проектлауга керешергә җыеналар

(Казан шәһәре KZN.RU, 28 нче гыйнвар, Ксения Швецова). Казанда соңгы 10 елда спорт объектлары саны бер ярым тапкырга диярлек арткан. Яңа объектлар ачылу һәм спорт мәктәпләренең булган тренировка базаларын модернизацияләү нәтиҗәсендә инфраструктура мөмкинлекләре арта. Мисал өчен, 10 ел эчендә ТР башкаласында йөзү бассейннары саны 40-тан алып 74-кә кадәр артты, дип хәбәр итте Казан Мэры Илсур Метшинга 2021 елга эш нәтиҗәләре турында хисап биреп, Физик культура һәм спорт комитеты рәисе Альберт Салихов.

«Безнең шәһәрдә 74 бассейннан 8 бассейн – 50 метрлы. Шәһәрләр өчен бу бик сирәк күренеш», – дип билгеләп үтте А.Салихов.

Универсаль спорт мәйданчыклары төзелеше дәвам итә: узган ел 4 объект, ә 2013 елдан 122 спорт мәйданчыгы файдалануга тапшырылган.

Милли проект буенча Казанда Химиклар урамындагы 130 нчы номерлы мәктәп территориясендә ачык типтагы физкультура-савыктыру комплексы төзелеше тәмамланды. Быел аны җиһазландыру планлаштырыла, дип хәбәр итте Физкультура һәм спорт комитеты рәисе. Сүз уңаеннан, мондый комплекс 2020 елда Зорге урамында, 21 нче номерлы гимназия территориясендә төзелгән.

Быел берничә объектны төзү, аерым алганда, 144 нче номерлы мәктәп базасында һәм «Салават күпере» торак комплексында футбол манежлары төзү, 49 нчы номерлы мәктәп территориясендә физкультура-сәламәтләндерү комплексы һәм Һ.Такташ урамы, 122, Беломорск урамы,18а, Оренбург тракты, 132 адреслары буенча 3 универсаль спорт мәйданчыгы төзү планлаштырыла.

«Татарстан Президенты кушуы буенча быел «Салават Күпере»ндә гимнастика үзәген, «Весна» торак комплексында баскетбол үзәген һәм «Тасма» стадионы территориясендә дзюдо үзәген проектлауга тотыначаклар, – дип өстәде А.Салихов. – Тагын кайбер объектлар проектлау стадиясендә булачак, шулай ук капремонтны дәвам итәчәкбез».

Исегезгә төшерәбез, бүген даими рәвештә спорт белән Казан халкының яртысыннан артыгы шөгыльләнә. 5 ел эчендә Татарстан башкаласында 193 спорт объекты төзелде, ә 2030 елга, база сценарие нигезендә, физкультура һәм спорт белән даими шөгыльләнүче халыкның өлеше 75%тан артып китәчәк.

Киңәшмәдә  Башкарма комитеты җитәкчесенең социаль өлкә мәсьәләләре буенча урынбасары Гүзәл Сәгыйтова да катнашты.