Вознесение трактының беренче участогында Гвардия урамы киселешендәге юлүткәргеч төзелеше 20%ка үтәлгән

(Казан шәһәре KZN.RU, 13-нче гыйнвар, Алинә Бережная). Казанда Гвардия урамыннан Җиңү проспектына кадәр 4 км озынлыктагы участокта Вознесение трактының беренче этабы кысаларында төзелеш дәвам итә. Объектта әзерлек эшләре тәмамланды, аерым алганда, инженерлык коммуникацияләрен чыгару, тоннель тибындагы ике юлүткәргеч, шулай ук өч җир асты кичүе төзелеше эшләре алып барыла. Бүген юл инфраструктурасы объектларын карап йөргәндә төзелеш эшләре барышын Казан Мэры Илсур Метшин контрольдә тотты, барлык эшләр дә график буенча алып барыла, дип ассызыклады ул. Анда шулай ук Совет районы хакимияте башлыгы Роман Фәтхетдинов катнашты.

Вознесение трактының беренче участогын төзү узган елның җәендә башланды. Проект буенча бу Гвардия урамыннан Җиңү проспектына кадәр 4 км озынлыктагы һәм һәр якка 13-17 метр киңлектәге юл булачак. Проект нигезендә велоюллар, яңгыр сулары канализацияләре булдыру каралган, ә тротуарларның киңлеге 2,2-4,5 м тәшкил итәчәк. Әзерлек эшләре барышында төзүчеләр Җиңү Проспектында 1,2 км озынлыкта һәм Гвардия урамында 890 м озынлыкта урап уза торган юллар салдылар, алар буенча хәзер транспорт хәрәкәте оештырыла.

«Бу – бишенче очыш магистрале, халык өчен бик мөһим булачак, ул юллардагы хәлне җиңеләйтәчәк, – дип билгеләп үтте шәһәр башлыгы. – Бу юл белән бергә без районның яңа үсешен дә алачакбыз, сәнәгать участокларын яңартачакбыз, биредә төзекләндерелгән территория, парк зоналары булган яңа торак район үсеш алачак».

Шәһәр Башкарма комитеты җитәкчесе урынбасары Игорь Куляжев Казан Мэрына көн саен объектта 240 кеше һәм 66 берәмлек техника – үзбушаткычлар, краннар, бораулау җайланмалары, экскаваторлар, бульдозерлар, компрессор җайланмалары эшләве турында сөйләде. Графиктан артта калулар юк. Трактның Гвардия урамы белән киселешендә күчмә киңәшмә узды, юлүткәргеч төзелеше 20%-ка үтәлгән. Җиңү проспекты белән тракт кисешкән урында эшләр 25%-ка үтәлгән, дип хәбәр итте Игорь Куляжев. Аларны төзү эшләрен сентябрь аенда тәмамлау планлаштырыла, шуннан соң Гвардия һәм Җиңү проспекты буенча хәрәкәт эш режимында башланачак.

Моннан тыш, хәзерге вакытта тимер юл аша күпер корылмасы төзелде, хәзер терәк диварларга нигез салына һәм юлүткәргечне төзекләндерү эшләре бара, дип билгеләп үтте Игорь Куляжев. Бохара һәм Ватан урамнарында барлыкка киләчәк өч җир асты кичүенең икесендә монолит эшләр башкарылган, хәзер баскычлар һәм җыеннар салына. Тагын бер җир асты кичүендә свайлар кертү тәмамлана, дип өстәде Башкарма комитет җитәкчесе урынбасары.

Вознесение тракты төзелешенең беренче этабын тулысынча 2023 елда тәмамлау планлаштырыла. Яңа юл Мамадыш трактын бушатып кына калмый, Вознесение, Олы Клыки, Самосырово, Салмачы, Привольный, Вишневка бистәләрендә, «Весна» һәм «Светлая долина» торак комплексларында юл проблемаларын өлешчә хәл итәчәк.

Моннан тыш, магистраль төзү Совет районында Ватан, Даурия, Гвардия һәм Гадел Кутуй урамнары чикләрендә 293 гектар мәйданлы территориянең үсешенә этәргеч булды. 2021 елның март аенда расланган планлаштыру проекты нигезендә 11 торак комплекс, шулай ук транспорт һәм инженерлык инфраструктурасы объектлары, социаль объектлар, шул исәптән мәктәпләр, балалар бакчалары һәм поликлиникалар төзү күздә тотыла. Планлаштыруга комплекслы якын килү аны Вознесение тракты белән бәйләргә һәм инженерлык инфраструктурасын үстерүне күздә тотарга мөмкинлек бирде.