И.Метшин: «Без «Салават Купере»ндә социаль инфраструктура – балалар бакчалары, мәктәпләр төзибез, әмма юл проблемаларын да хәл итәргә кирәк»

(Казан шәһәре KZN.RU, 21-нче декабрь, Алинә Бережная). Казанда Осиново урамын реконструкцияләүгә әзерлек эшләре алып барыла. Проект буенча шәһәрнең Киров районында юл дүрт полосага кадәр киңәйтеләчәк, бу «Салават Купере» микрорайонында яшәүчеләргә транспорт хезмәте күрсәтүне яхшыртырга мөмкинлек бирәчәк. Юлны киңәйтү өчен инде 23 участок сатып алынган. Казан Мэры Илсур Метшин булачак эшләр урынына барып, объектны реконструкцияләү проекты белән танышты. Аны Киров һәм Мәскәү районнары башлыгы Сергей Миронов, «Волга-Автодор» ҖЧҖ директоры Станислав Шевырев озата йөрде.

«Бу бик кирәкле юл. Бүген «Салават күпере» микрорайонында 19 мең кеше яши һәм аларның саны даими үсә, шуңа күрә транспорт белән тәэмин итү, шәхси һәм җәмәгать транспортында йөрү мөмкинлеге мөһим мәсьәлә булып тора, – дип ассызыклады шәһәр башлыгы. – Без «Салават күпере»ндә социаль инфраструктура – балалар бакчалары, мәктәпләр төзибез, әмма юл проблемаларын да хәл итәргә кирәк. Юл участогы Горький шоссесындагы микрорайоннан чыгуны җиңеләйтәчәк».

Осиново урамындагы 1,4 км озынлыктагы участокның дүрт полосага кадәр киңәйтелүеннән тыш, биредә проект буенча 2,5 метр киңлектәге тротуарларны ике яктан төзекләндерү, 1,5 метр киңлектә велоюллар салу, өч светофор төене урнаштыру һәм кварталара юлларны ремонтлау каралган. Моннан тыш, урамны реконструкцияләү кысаларында инженерлык коммуникацияләрен күчерү һәм яңгыр сулары канализациясен төзү планлаштырыла.

Башкарма комитет җитәкчесе урынбасары Игорь Куляжев сүзләренә караганда, юл төзелеше өчен 23 участок сатып алынган, аларда йортлар сүтелгән. «Чүп-чар чыгару эшләре тәмамлана, бу участоклардагы объектларга тоташтырылган газүткәргеч һәм суүткәргеч челтәрләрендә эшләр алып барыла», – дип хәбәр итте ул Мэрга.

Транспорт ситуациясен яхшыртудан тыш, юлны киңәйтү «Салават күпере-2» микрорайонында яшәүчеләргә Осиново урамына тоткарлыксыз чыгарга мөмкинлек бирәчәк. Әйтик, эшләр барышында Осиново һәм Наил Йосыпов урамнары чатын реконструкцияләү планлаштырыла. Игорь Куляжев «Салават Купере-2»-дән чыккан машина йөртүчеләр туры юнәлештә хәрәкәт итүчеләргә юл бирергә мәҗбүр, шуңа күрә бу участокта уң борылышны гына калдырырга тәкъдим ителә, дип аңлатты. «Наил Йосыпов урамыннан Осиново урамына чыкканда, машина йөртүчеләр уңга китә, алга таба Залесный  яки «Салават Купере-1» ягына китә алачак», – дип билгеләп үтте ул.

Осиново урамындагы юлны киңәйтү эшләрен киләсе елның көзендә төгәлләү планлаштырыла.