Казанда «ТР өчен илле иң яхшы инновацион идея» конкурсына йомгак ясалды

(Казан шәһәре KZN.RU, 21-нче декабрь). «ТР өчен 50 иң яхшы инновацион идея» XVII республика конкурсында җиңүчеләрне Казанда Татарстан Республикасы Президенты Рөстәм Миңнеханов рәислегендә Татарстан Республикасы Инвестиция-венчур фонды попечительләр советының киңәйтелгән утырышында бүләкләделәр. Тантана «Корстон» кунакханә-сәүдә-күңел ачу комплексында узды. Анда шулай ук Татарстан Республикасы Премьер-министры Алексей Песошин, Казан Мэры Илсур Метшин, Россия венчур форумының күзәтчелек советы һәм оештыру комитеты вәкилләре катнашты.

«Бүген безнең уңышлы хезмәттәшлегебез нәтиҗәсендә Татарстан –инновацияләрне җәлеп итү үзәге. Без ел саен Россия венчур форумын, шулай ук «Татарстан Республикасының илле иң яхшы инновацион идеясе» һәм «Идея-1000» бәйгеләрен уздырабыз. Ә иң перспективалы инновацион компанияләр акселерация программасын уза, – диде республика башлыгы. – Әлеге ярдәм чараларын гамәлгә ашыру киләсе елда да дәвам итәчәк».

«Татарстан Республикасы өчен 50 иң яхшы инновацион идея» конкурсы һәм «Идея-1000» инновацион проектларына ярдәм программасы нәтиҗәләрен Татарстан Республикасы Фәннәр академиясе президенты Мәгъзүм Сәлахов һәм Татарстан Республикасы Инвестиция-венчур фонды директоры Айнур Айделдинов игълан итте. Яңа фәнни ачышлар нәтиҗәсендә тормышка ашырыла торган эшмәкәрлеккә ярдәм итү механизмнары турында фәнни-техник өлкәдә предприятиеләрнең кече формаларын үстерүгә ярдәм итү Фонды генераль директоры Сергей Поляков, федераль үсеш институтларының эшчәнлеге турында Россиянең турыдан-туры инвестицияләр фонды генераль директорының беренче урынбасары Александр Браверман сөйләде. Акселерация Программасы нәтиҗәләре турында доклад белән «Пульсар Венчур Кэпитал» дәүләт корпорациясе генераль директоры Павел Королев чыгыш ясады, 2022 елгы Россия венчур форумын үткәрүгә әзерлек турында – Россия венчур инвестицияләү ассоциациясе башкарма директоры Альбина Никконен һәм Санкт-Петербургның Фәнни-техник үсеш төбәк фонды башкарма директоры Игорь Гладких чыгыш ясады.

Утырыш азагында Татарстан Республикасы Хөкүмәте һәм Фәнни-техник өлкәдә предприятиеләрнең кече формаларын үстерүгә ярдәм итү фонды арасында хезмәттәшлек турында килешүгә кул куелды, дип хәбәр итә ТР Президенты матбугат хезмәте.

Фоторепортаж

Видеорепортаж