И.Метшин: «Спортның сәламәтлек мөмкинлекләре чикләнгән кешеләр өчен терәк булуы мөһим»

(Казан шәһәре KZN.RU, 13-нче сентябрь, Алинә Бережная). 16-нчы сентябрь көнне Казанда «Бергәләп җиңәбез» дигән йөзү буенча ачык Бөтенроссия турниры старт ала. «Акчарлак» йөзү бассейнында узачак ярышларда илнең 31 төбәгеннән Даун синдромы булган 100-дән артык спортчы катнашачак. Казан Мэры Илсур Метшин Башкарма комитетта узган эшлекле дүшәмбе киңәшмәсендә турнирда чыгыш ясаучы яшьләрнең җанатарлар ярдәменә мохтаҗ булуын ассызыклады. «Яшьләрне әти-әниләр һәм дуслар гына түгел, башка җанатарлар да хупласын иде. Бу эшне Кулланучылар хокукларын яклау һәм кеше иминлеге өлкәсендә күзәтчелек федераль хезмәте күрсәтмәләрен үтәп оештырырга кирәк, – диде шәһәр башлыгы.

Илсур Метшин алда торган ярышларның мөһимлеген билгеләп үтте, һәркем, сәламәтлек торышына бәйсез рәвештә, спорт белән шөгыльләнергә тиеш, дип ассызыклады. «Кеше капиталы – шәһәр, төбәк һәм ил үсеше өчен төп ресурс. Бүген спортның сәламәтлек мөмкинлекләре чикләнгән кешеләр өчен дә терәккә әверелүе мөһим. Моның белән без инде шөгыльләнәбез һәм үз алдыбызга бурыч куябыз – сәламәтлекләре белән проблемалары булган кешеләрне мөмкин кадәр күбрәк җәлеп итү», – диде шәһәр башлыгы, шәһәрнең спорт объектларында уңайлы мохитне тәэмин итәргә кирәк, дип өстәде шәһәр башлыгы.

Йөзү буенча Бөтенроссия турниры Казанда өченче тапкыр уздырыла, узган ел ул санитар-эпидемиологик вәзгыятькә бәйле рәвештә гамәлдән чыгарылды, дип искәртте Казанның Физик культура һәм спорт комитеты башлыгы Альберт Салихов. Турнир сәламәтлекне ныгытуга, тернәкләндерүгә һәм җайлаштыруга, шулай ук Даун синдромы булган затларның физик культура һәм спорт белән даими шөгыльләнүенә җәлеп итүгә юнәлтелгән.

Турнир кысаларында тантаналы ачу, шулай ук шәһәр кунаклары өчен зур ял программасы, шул исәптән Даун синдромлы балалар проблемалары белән шөгыльләнүче актив әниләр һәм Казан коммерцияле булмаган оешмалары җитәкчеләре очрашуы планлаштырылган. Ярышларның йомгаклау көнендә, 21-нче сентябрьдә, «Игелекле Казан» проекты ярдәмендә турнирда катнашучыларның махсус әзерләнгән чыгышлары белән иҗади кичә оештырылачак.