Казан Мэры Илсур Метшин приюттан эт алырга әзер булуы турында белдерде

(Казан шәһәре KZN.RU, 25-нче август, Ксения Швецова). 29-нчы август көнне Горький исемендәге Казан паркында икенче тапкыр «Яңа дустыңны тап» акциясе узачак. Анда шәһәр халкы «Зооцентр» приютындагы этләр белән якыннанрак таныша һәм үзләре өчен йорт хайваны сайлый алачак. Приюттан эт алырга теләүчеләр арасында Казан Мэры Илсур Метшин да бар. Мондый планнары белән ул бүген «Сәйдәш» мәдәни үзәгендә узган  түгәрәк өстәлдә уртаклашты.

Казанлылар белән очрашуга приютның дустанә, вакциналы һәм стерильләштерелгән яшәүчеләрен алып киләчәкләр. Шулай ук шәһәр халкы йорт хайваннарын тәрбияләү буенча киңәшләр бирәчәк белгечләр белән аралаша алачак.

Беренче мондый акцияне Мәскәүдә ун ел элек уздырдылар, дип сөйләде түгәрәк өстәлдә Мәскәүнең  «Язмыш бүләге» фонды директоры Наталья Чаплин. Аның сүзләренчә, ул вакытта бу резонанслы вакыйга булган, ә хәзер бу тәҗрибә башка шәһәрләр тарафыннан актив үзләштерелә.

«Һәм без бу тәҗрибәне карап чыктык. Якшәмбе көнне этләрнең чираттагы күргәзмәсе булачак, анда мин дә үземә хайван алачакмын», – дип җавап бирде Казан Мэры. Исегезгә төшерәбез, Казанда беренче мондый акция июль аенда узды, нәтиҗәдә «Зооцентр» приютыннан ун эт үзләренә йорт тапты.

Н.Чаплин фикеренчә, кешеләргә этләрне заводчылардан сатып алу гына түгел, приютлардан да алырга мөмкин булуы турында сөйләү мөһим. «Приюттан этләрне алырга мөмкин һәм кирәк дигән җәмәгатьчелек фикерен формалаштыру мөһим. Кешеләр приюттагы этләрне авыру дип уйлый. Чынлыкта алар менә дигән, бу турыда сөйләргә кирәк», – дип саный Н.Чаплин.

Ул шулай ук билгеләп үткәнчә, йорт этләре белән проблеманы хәл иткәндә, беренче чиратта, кешеләрнең хайваннарга карата җаваплы мөнәсәбәте мөһим. «Йөз процент очракта хайваннар урамда кеше аркасында кала –  этне йә ташлап киткәннәр, йә хайван нәсел биргән, һәм көчекләрен ташлаганнар», – диде ул.

И.Метшин шәһәр халкын актив агарту идеясен хуплады. «Бездә хәзер мәче яки көчек бүләк итү нәрсәне аңлата? Барыннан да ешрак максат – баланы сөендерү. Теләк аңлы булырга тиеш, шуны аңлау кирәк, эт хуҗасын көн саен йөреп кайту көтә, гадәтләрне үзгәртергә туры киләчәк, хайванның үз характеры булачак һәм башкалар. Бу хакта сөйләргә кирәк», – дип ышана шәһәр башлыгы.

Ул мисал сыйфатында түгәрәк өстәл каршындагы проектлар күргәзмәсендә 152-нче номерлы гимназия укучылары эшләгән инструкцияне китерде.