Илсур Метшин: «Безнең хыял - карны җыеп бармыйча утильләштерү»

(Казан шәһәре KZN.RU, 19-нчы октябрь, Алсу Сафина). Казанда Гадел Кутуй урамында декабрьгә тәүлеккә 3600 кубометр кар җитештерүче яңа, җиденче кар эретү пунктын файдалануга тапшыру планлаштырыла. Бу уртача күләмдә кар яву вакытында шәһәрдә карны вакытлы чүплекләрдән файдаланмыйча тулысынча утильләштерергә мөмкинлек бирәчәк. Бүген эшлекле дүшәмбедә Казан Мэры Илсур Метшин билгеләп үткәнчә, бу шәһәрдә экологик вәзгыятьне яхшыртуга чираттагы адым.

«Иң мөһиме, декабрьгә алты кар эретү камерасына өстәп, җиденчесен тапшырачакбыз. Безнең хыял - карны җыеп бармыйча гына утильләштерү, - диде ул. - Әгәр дә озакка сузылган буран, аномаль күренешләр булмаса, без карны җыеп бармыйча, экологиягә зыян салмыйча, шәһәр буенча бөтен кар өемнәрен утильләштерә алачакбыз. Шулай адым артыннан адым ясап, без шәһәребездә экологик вәзгыятьне яхшыртуга таба ышанычлы һәм системалы рәвештә хәрәкәт итәбез».

Яңа объектны файдалануга тапшыру Совет, Вахитов һәм Идел буе районнары юлларыннан карны чыгару һәм утильләштерү вакытын кыскартырга мөмкинлек бирәчәк, шулай ук шәһәрнең кар эретү пунктларының җитештерүчәнлеге тәүлеккә 15600 куб тоннага кадәр артачак, дип хәбәр итте Башкарма комитет җитәкчесе урынбасары - Тышкы төзекләндерү комитеты рәисе Игорь Куляжев.

Аның сүзләренә караганда, хәзер кар эретү һәм утильләштерү өчен алты кар кабул итү пункты әзерләнә.

Быел гадәттән тыш хәлләр очрагында, көчле кар яву очрагында, өстәмә рәвештә карны вакытлыча салып тору өчен сигез мәйданчык куллану планлаштырыла.

Исегезгә төшерәбез, беренче кар эретү пункты Казанда 2007 елда (Порт урамы буенча) барлыкка килде. Иң эре станция Җиңү проспектында, «Мега» һәм «Южный» сәүдә үзәкләре арасында урнашкан.