Рөстәм Миңнеханов һәм Илсур Метшин Казанның Азык-төлек һәм социаль туклану департаментында булып кайтты

(Казан шәһәре KZN.RU, 1-нче сентябрь). Бүген Татарстан Республикасы Президенты Рөстәм Миңнеханов Казанның азык-төлек һәм социаль туклану департаментының мәктәп балаларын ашатуны оештыруга әзерлеген бәяләде.

Рөстәм Миңнехановны Татарстан Республикасы Президенты Аппараты җитәкчесе Әсгат Сәфәров, Казан Мэры Илсур Метшин, Роспотребнадзорның Татарстан Республикасы буенча идарәсе җитәкчесе Марина Патяшина озата йөрде.

Казанның азык-төлек һәм социаль туклану департаманты шәһәрнең гомуми белем оешмаларын, мәктәпкәчә һәм социаль учреждениеләрен, шулай ук якындагы муниципаль районнарны тукландыруны оештыру һәм аларны продуктлар белән тәэмин итү эшчәнлеген гамәлгә ашыра.  

Предприятие муниципаль мәктәпкәчә һәм гомуми белем оешмаларын, шул исәптән Казанның халыкара мәктәбен, «Адымнар» күп телле мәктәбен, Казан  Суворов хәрби училищесын һәм башкаларны, Арча, Әтнә, Лаеш, Балтач, Югары Ослан, Биектау, Яшел Үзән, Кайбыч, Питрәч, Теләче районнарының мәктәпкәчә һәм гомуми белем оешмаларын кайнар ризык белән тәэмин итә.

Рөстәм Миңнеханов, Илсур Метшин һәм башка кунаклар өчен Департамент эшчәнлеген оештыруны, җирле җитештерүчеләр продукцияләре үрнәкләрен тәкъдим иттеләр.

Татарстан Президенты һәм Казан Мэры ашамлыкларны бушату зонасын карадылар, кайнар цехта эшләрнең ничек оештырылуын бәяләделәр. Аннары мәктәп менюсындагы үзләре җитештергән ашларны тарату линиясен карап чыктылар.  

Татарстан Президентына шулай ук башлангыч сыйныф укучыларына бирелә торган тулы менюны тәкъдим иттеләр, дип хәбәр итә ТР Президенты матбугат хезмәте.

Аңлатмаларны «Казан шәһәренең Азык-төлек һәм социаль туклану департаменты» акционерлык җәмгыятенең генераль директоры Рима Мөхәммәдшина биреп барды.