Илсур Метшин апрель өчен Идел буе федераль округының башкала башлыклары медиарейтингын җитәкләде

(Казан шәһәре KZN.RU, 19-нчы май). Казан Мэры Илсур Метшин 2020 елның апреле өчен Идел буе федераль округының башкала башлыклары медиарейтингының башында булды.

Федераль һәм төбәк массакүләм мәгълүмат чараларын анализлау нәтиҗәләре буенча Казан Мэрының медиаиндексы 13049,7 пунктны тәшкил иткән. Массакүләм мәгълүмат чаралары язганча, Илсур Метшин шәһәр Башкарма комитеты идарәләре җитәкчеләренә үзизоляция режимы тәмамланганнан соң саклык чаралары исемлеген эшләргә йөкләмә биргән. Шулай ук массакүләм мәгълүмат чаралары Илсур Метшин алдагы җылылык белән тәэмин итү сезонына әзерлек буенча киңәшмәдә үзизоляция режимы тәмамланганчы Казанда кайнар суны сүндермәскә кушты, дип хәбәр итте. Моннан тыш, Казан мэры Илсур Метшин шәһәр волонтерларының үзәк штабында булды һәм үз автомобильләрендә пенсионерларга азык-төлек илтә торган волонтерларга бензин чыгымнарын компенсацияләргә вәгъдә итте.

Медиарейтингның икенче урынында Саратов Мэры Михаил Исаев (11359 пункт), ә өченчедә Чебоксар башлыгы Алексей Ладыков (7 853 пункт) урнашкан.

Рейтинг массакүләм мәгълүмат чаралары базасы нигезендә «Медиалогия» мәгълүмати-аналитик системасы тарафыннан төзелгән, ул 54 меңнән артык чыганакны үз эченә ала: ТВ, радио, газета, журналлар, мәгълүмат агентлыклары, интернет-массакүләм мәгълүмат чаралары. Казан Мэры моңа кадәр дә берничә тапкыр Идел буе федераль округы субъектлары башкалаларының беренче затлары медиарейтингларының башында торды.