Казан мэры Африканың Хараре шәһәре башлыгы белән очрашты

Бүген Казан Башкарма комитетында шәһәр башлыгы Илсур Метшин Зимбабве делегатлары белән очрашты. Чарада Хараре шәһәре мэры Джейкоб Мафум һәм илнең җирле үзидарә һәм иҗтимагый эшләр министры Дэниэл Гарве катнашты. Яклар үзара файдалы хезмәттәшлек һәм төрле өлкәләрдә уртак проектларны гамәлгә ашыру турында фикер алыштылар.

Кунакларны сәламләп, Илсур Метшин ассызыклаганча, Татарстан башкаласы эшләгән тәҗрибәләре белән уртаклашырга шат. Үз чиратында делегатлар кунакчыллыклары өчен рәхмәт белдерделәр һәм киләчәктә хезмәттәшлек итәргә теләк белдерделәр. Алар искәрткәнчә, кичә Ратушада түгәрәк өстәл артында сәүдә, иҗтимагый киңлекләрне төзекләндерү һәм кадрлар сәясәте буенча шәһәр проектлары белән танышканнар — шәһәрнең Башкарма комитеты вәкилләре тәҗрибә белән уртаклашканнар.

Бүген яклар шулай ук сәүдә һәм шәһәр икътисады, төзекләндерү, туристлык кебек өлкәләрдә хезмәттәшлек мәсьәләләре буенча фикер алыштылар, шулай ук башка юнәлешләр буенча активрак хезмәттәшлек итәргә килештеләр.

Исегезгә төшерәбез, Зимбабведан 34 кешедән торган делегация Казанга килде. Сәфәрне Татарстан Республикасы сәнәгать һәм сәүдә министрлыгы оештырды. Республика башкаласында кунаклар Мәскәү базарын төзекләндерү барышы белән танышачаклар, агросәнәгать паркында, Татарстан Республикасы Инвестиция үсеше агентлыгында, шулай ук Казан Кремлендә булачаклар. Бүген делегация ТР рәисе Рөстәм Миңнеханов белән очрашты. 

Казан белән Хараре арасындагы мөнәсәбәтләр 2011 елда, кардәшлек мөнәсәбәтләре урнаштыру турында килешүгә кул куелгач башлана. 2016 елда ТР Экспорт корпорациясе 2016 елда Булавайода (Зимбабве) ZITF-2016 халыкара сәнәгать күргәзмәсендә РФ Сәнәгать һәм сәүдә министрлыгының милли тактасын әзерләде. Соңрак, 2021 елда, Казанга танышу сәфәре белән Зимбабвеның Россиядәге Гадәттән тыш һәм тулы вәкаләтле илчесе Майк Николас Санго килде. Делегатлар белән Рөстәм Миңнеханов очрашты. 2024 елда «Киләчәк уеннары» турнирын ачу тантанасында Зимбабвеның беренче вице-президенты Константино Чивенга катнашты. Турнирда Африка иленнән спортчылар шахмат буенча виртуаль режимда ярышларда уйнадылар.