Казан Мэры кушуы буенча Клара Цеткин урамындагы 31а йортның түбәсен һәм зыян күргән фатирларны ремонтлаячаклар

Пилотсыз очучы аппарат Клара Цеткин урамындагы 31а йорт чормасына эләгү нәтиҗәсендә җылылык контуры бозылган, беренче катка кадәр бер секциядәге барлык фатирларны су баскан. Махсус хезмәтләр шартлау куркынычы булган аппаратны тикшерүне һәм юк итүне дәвам итә, бүген үк җылылык контурын торгызу эшләрен башлау планлаштырыла. Казан мэры Илсур Метшин кушуы буенча түбәләрне һәм зыян күргән фатирларны оператив ремонтлау өчен ресурслар әзерләнгән. 31а номерлы йорт капиталь ремонт планына кертеләчәк.

Киров һәм Мәскәү районнары администрациясе башлыгы Владимир Жаворонков оператив штабта хәбәр иткәнчә, урында зыян күрүчеләр юк. Һәлакәт урынына беренчеләрдән булып килгән һәм эвакуацияләү буенча халык белән эш алып барган «Заречье» ИК зур эш башкарган. 31а йортта яшәүчеләрнең күп өлеше туганнарына киткән, тагын 14 кеше «Релита» кунакханәсендә урнашкан.

Моннан тыш, куркынычсызлыкны тәэмин итү өчен Клара Цеткин урамындагы 33 һәм 34 нче йортларда яшәүчеләрне эвакуацияләү оештырылды. Өч күпфатирлы йортта 424 кеше теркәлгән, шуларның 31а номерында – 42 кеше, 33 номерында – 141 һәм 34 номерында – 241 кеше. Барлыгы 284 кеше үз йортларын мөстәкыйль ташлап киткән. «Тагын 140 кеше урнаштырылган: «Релита» (35), «Центральная» (27), «Волга» (тугыз) кунакханәләрендә, «Сафара» кунакханәсендә (бер), туганнарында 68 кеше урнашкан», – дип өстәде Владимир Жаворонков.

Йортларның берсендә яшәүчеләр шулай ук якындагы 32 нче мәктәпкә вакытлыча урнаштырылды, анда мәгариф учреждениесе җитәкчелеге район администрациясе белән берлектә эвакуацияләнгәннәрне ашатуны оештырды, беренче кирәкле предметлар, шул исәптән телефоннар өчен зарядка җайланмалары һәм башкалар белән тәэмин итте.

Идарәче компания район администрациясе белән берлектә һәрбер кеше белән элемтәдә тора, аларның ихтыяҗларын тормышка ашыру эшен дәвам итә. «Мисал өчен, бер хатын-кыз тернәкләнүдә. Аның өчен барлык кирәкле даруларны сатып алу оештырылган. Кунакханәдә эвакуацияләнгән халык өчен азык-төлек җыелмалары тапшырылды», - дип йомгаклады район администрациясе башлыгы.

Урнаштыру пунктларын табу турында сорауларны түбәндәге номер буенча бирергә була: +7(843)223-29-99 (өст. 23302).