Илсур Метшин «Киләчәк уеннары» турында: «Без кешелек тарихында яңа вакыйганың шаһитлары булачакбыз»

Казанга «Киләчәк уеннары» халыкара мультиспорт турнирында катнашу өчен 60 илдән 1,4 меңгә якын кеше килде. Ярышларда барлыгы 100 дән артык дәүләт вәкилләре катнашыр дип көтелә. ТР башкаласы мэры Илсур Метшин бүген эшлекле дүшәмбедә шәһәрнең, шул исәптән спорт инфраструктурасының да, кунакларны кабул итәргә тулысынча әзер булуын белдерде. Шәһәр башлыгы шулай ук тамашачыларның һәм җанатарларның турнирны зур кызыксыну белән көтүен билгеләп үтте.

«Бүгенге көндә барлык мәйданчыклар да әзер. Уеннарны дулкынланып көтәбез. «Казан Экспо»да узачак ачылу тантанасына һәм финалга, Dota 2 уены ярымфиналына билетлар биш минут эчендә сатылып бетте. Фиджитал-футбол, скейтбординг һәм спортның башка төрләре буенча ярышларга да билетлар сатуда инде юк. Бу тамашачыларда әлеге чарага карата зур кызыксыну булуы турында сөйли», – дип өстәде Илсур Метшин.

Мэр ассызыклап узганча, турнирны оештыру өчен зур җаваплылык шәһәр Башкарма комитеты, республика рәисе Рөстәм Миңнеханов җитәкчелегендәге Татарстан хөкүмәте, Уеннарны оештыру комитеты рәисе Дмитрий Чернышенко җитәкчелегендә федераль хакимият органнары җилкәсенә төшкән. Нәкъ менә Казандагы «Киләчәк уеннары» әлеге ярышлар тарихына башлангыч бирәчәк.

«Без Казан, ил тарихында гына түгел, бөтен кешелек тарихында зур яңа вакыйга алдында торабыз. Бәхеткә, казанлылар, оештыручылар һәм катнашучылар сыйфатында, әлеге чараның беренче шаһитлары булачак», – диде Илсур Метшин.

Уеннарны уздыруга әзерлек төгәлләнеп килә. Бүген турнирны ачу тантанасының генераль репетициясе узачак.

«Барыбыз да әлеге ярышлар белән яшибез. Алар яшьләрнең, балаларның киләчәге, дип уйлыйм. Казан чираттагы мәртәбә спорт тарихында зур мирас калдырачак, бу юлы «Киләчәк уеннары»ннан соң. Ул республика, ил һәм бөтен дөнья буйлап таралачак. Киләчәге якты, матур, ышанычлы булсын», – дип нәтиҗә ясады Илсур Метшин.

Камилә Вилданова