Вахитов һәм Идел буе районнарында бөтен кварталның 37 йорты һәм ишегалды капиталь ремонтланачак

Быел торак фондын капиталь ремонтлау программасы Казанның Вахитов һәм Идел буе районнарындагы 37 йортка кагылачак. Эшләр 625,7 млн сумга планлаштырылган. 2023 елда 541 млн сумнан артык суммага 41 объект капиталь ремонтланган – уңайлыклар 8,8 меңнән артык кешене колачлаган. Бу хакта шәһәр мэры Илсур Метшинга еллык хисап барышында район администрациясе башлыгы Альберт Салихов хәбәр итте.

Узган ел Вахитов һәм Идел буе районнарында барлыгы 22 фасад яңартылган һәм җылытылган, 17 йортта җылыту торбалары һәм тагын 18 бинаның түбәсе алыштырылган. Шулай ук 13 йортта 38 лифт яңартылган – соңгы өч елда 55 яңа күтәрү конструкциясе урнаштырылган.

Исегезгә төшерәбез, торак фондын адреслы капиталь ремонтлау программасы Татарстанда 2008 елдан бирле гамәлгә ашырыла. Бу вакыт эчендә Вахитов һәм Идел буе районнарында 7 млрд сумнан артыкка 814 йорт ремонтланган. 2024 елдан 2040 елга кадәр тагын 658 күп фатирлы йортны яңарту таләп ителә.

Альберт Салихов сүзләренчә, эшләр агымдагы ремонт программасы кысаларында да алып барыла. Әйтик, узган ел 334 йортта 169,2 млн сумга аерым эшләр башкарылган.

Параллель рәвештә «Безнең ишегалды» республика программасы гамәлгә ашырыла. Быел аның кысаларында – төзелә торган Г.Камал театры янындагы кварталда зур күләмдә эшләр башкару планлаштырыла. Нурсолтан Назарбаев – Марсель Сәлимҗанов – Һади Такташ урамнары чикләрендәге территория 20 йорт яны территориясен үз эченә ала, бу бөтен программаның дүрттән бер өлешен тәшкил итә. Төзекләндерү эшләре 7 меңгә якын кешегә кагылачак.

«Тар ишегаллары һәм күп санлы инженерлык челтәрләре кварталның үзенчәлеге булып тора. Комплекслы алым тышкы яктырту белән транзит җәяүлеләр элемтәләрен төзекләндерүне күздә тота. Ремонт эшләре проекты «Мәктәпкә юл» программасы кысаларында 27 нче һәм 41 нче мәктәпләрнең ата-аналары һәм укучылары, 77 нче, 89 нчы, 322 нче балалар бакчалары тәрбияләнүчеләренең теләкләрен исәпкә алып төзелде», – дип белдерде спикер. 2023 елның декабрендә «пилот»ны эшләтеп җибәрү турында Казан мэры җиткерде. Яңа проект ярдәмендә балалар һәм ата-аналар белем бирү учреждениеләренә бару маршрутларында куркынычсыз һәм уңайлы мохит булдыруга үз өлешләрен кертә алачак.

Дүрт ел эчендә әлеге районнарда 447 торак йорт яки 282 йорт, 164 балалар мәйданчыгы һәм 100 спорт зонасы төзекләндерелгән. Уңайлыклар 81 меңнән артык кешене колачлаган. Эшләргә 2,8 млрд сум акча бүлеп бирелгән.

«Татарстан Рәисе программасы ярдәмендә 2023 елда 76 ишегалды яңартылды, анда 47 балалар һәм 25 спорт мәйданчыгы төзекләндерелде, шулай ук 892 ут баганасы куелды», – дип сөйләде район администрациясе башлыгы. Ул тагын 251 территорияне төзекләндерү кирәклеген өстәде.