И.Метшин: «Бөек Җиңүдә һәм данлы үткәндә без иҗат, тыныч тормыш, игелекле башлангычлар өчен көч алабыз»

(Казан шәһәре KZN.RU, 9-нчы май). Казан Мэры Илсур Метшин Татарстан башкаласында яшәүчеләрне Бөек Җиңүнең 76 еллыгы белән котлады.

«Хөрмәтле казанлылар! Сезне чын күңелдән Җиңү көне белән котлыйм!

9-нчы Май һәркайсыбызның йөрәгендә аерым урын алып тора. Бөек Ватан сугышы вакытында илебезнең күпмилләтле халкы чыннан да ирекле яшәү, эшләү, балаларны туган җирендә тәрбияләү хокукына күп газаплар белән иреште. Ватаныбызга һәм югары кешелек кыйммәтләренә тугрылык безнең әти-бабаларыбызның рухын сындырмады.

Бүген без озак көтелгән Җиңүне якынайтучыларны искә төшереп, кайгырабыз һәм рәхмәт белдерәбез. Алар арасында – фронтка киткән яки тылда эшләгән Казан халкы да бар. Татарстан башкаласы армияне тәэмин итүдә зур роль уйнады, һәм аңа «Хезмәт батырлыгы шәһәре» дигән мактаулы исем бирелү шәһәрлеләрнең батырлыгын тану өчен бәхәссез дәлил булды.

Бөек Җиңүдә һәм данлы үткәндә без тыныч тормыш, игелекле башлангычлар өчен көч алабыз, һәм һәрберебезнең изге бурычы – канкойгыч сугыш турында тарихи дөреслекне саклап, киләчәк буыннарга Хәтер Вахтасын тапшыру.

Әлеге тантаналы май көнендә хөрмәтле һәм кадерле ветераннарга ихлас күңелдән нык сәламәтлек, озын гомер, бәхет һәм тирә-юньдәгеләр игътибарын телим! Сезнең алда баш иябез, батыр җиңүчеләр буыны!

Тынычлык, игелек һәм барлык казанлыларга иминлек!» – диелә котлауда.